“Neftchi” va “Lokomotiv” klublari sobiq murabbiyi Andrey Fyodorov “SKA-Xabarovsk” bosh murabbiyi Sergey Yuranning “Spartak” yarim himoyachisi Oston O‘runov haqidagi gaplariga munosabat bildirdi.
— O‘runovni O‘zbekistondagi faoliyatim orqali bilaman, u yerda 6 yil ishladim va aytishim mumkinki, o‘zbek futboli ichida bunday holatlar bo‘lgan. U yerda hattoki o‘zgartirilgan hujjatlar uchun o‘yinchilar diskvalifikatsiya qilingandi.Shuning uchun aytishim mumkinki, bundan ikki-uch yil oldin O‘zbekistonda bunday holatlar kuzatilgan. Ammo O‘runov borasida hech narsa deya olmayman. Bu mish-mishlar uzoq vaqtdan beri mavjud, ammo bu so‘zlar, xolos. O‘runovni hech kim tekshirmagan va aniq bilmaydi. Shuning uchun men Yuranning so‘zlarini na tasdiqlay olaman va na rad eta olaman. O‘runov 16 yoshida “Navbahor”ning dublida o‘ynardi, o‘sha paytda menga uning o‘yini yoqqandi. Men uni “Neftchi”ga taklif qilmoqchi bo‘lganman, ammo bu amalga oshmagan. Esimda, uni 2000-yil deb aytishgandi. Bo‘ldi, boshqa hech qanday gap bo‘lmagan.
— Uning 2000-yil ekanligi sizni hayron qoldirganmi?
— Hayron bo‘ldim, albatta. U allaqachon yetilib bo‘lgandi, uning yoshida hamma ham shunday ko‘rinmasdi. Ammo men uning yoshi kichraytirilgan yoki hujjatlari qalbakilashtirilgan deb o‘ylamagandim. Shuning uchun buni hech kim ayta olmaydi. Bilmadim, Sergey Yuran bu ma’lumotni qayerdan olgan.
— Murabbiyning butun mamlakatga bunday narsalar haqida gapirishini to‘g‘ri deb o‘ylaysizmi?
— Rostini aytaman. Men bunday demagan bo‘lardim. Ma’lumot shuki, siz uni hech qanaqasiga isbotlay olmaysiz. Bu mish-mish darajasida. Bu mening shaxsiy fikrim.
Avvalroq Yuran o‘zbekistonlik futbolchi ko‘rsatilganidan 4-5 yoshga kattaligini aytgandi.
19-dekabrda 20 yoshga to‘ladigan O‘runov 2019/20-yilgi mavsumning ikkinchi yarmida “Ufa” safida RPLda 10 o‘yin o‘tkazgan. Yozgi transfer oynasida 19 yoshli futbolchi Moskvaning “Spartak” jamoasiga o‘tgandi.
Oston Rossiya chempionati 2020/21-yilgi mavsumida 8 ta o‘yinda maydonga tushdi (bir marta asosiy tarkibda) va birorta ham samarali harakat amalga oshira olmadi.
Izoh (0)