Toshkent viloyati prokuraturasi ijtimoiy tarmoqlarda o‘g‘liga nisbatan qo‘llanilgan qamoq jazosi o‘zgartirilmasa, o‘zini yoqib yuborish bilan tahdid qilib kelgan ayol to‘g‘risidagi xabarlarga munosabat bildirdi.
Ma’lumotlarga ko‘ra, B.M. ismli shaxs 2017-yil mart oyida V.M. ismli fuqaroni yashash uchun boshpanasi yo‘qligidan foydalanib, uni xonadoniga olib kelgan. Unga boshpana berganligi uchun o‘ziga qaram qilib, tekinga yollanma ishchi sifatida ishlatib kelgan va uning shaxsiga oid barcha hujjatlarini olib qo‘yib, xizmat haqi bermagan.
Ikki nafar fuqaroning arizasi yuzasidan holat bo‘yicha 23-sentabr kuni Ohangaron tuman IIB huzuridagi tergov bo‘limi tomonidan jinoyat ishi qo‘zg‘atilgan. 24-sentabr kuni prokurorning tintuv o‘tkazish haqidagi sanksiyasi bilan videotasvirga olingan holda B.M.ning yashash xonadonidan V.M.ning fuqarolik pasporti, jamg‘arib boriladigan pensiya daftarchasi, notarial tartibda rasmiylashtirilgan ishonchnoma, ish haqi to‘g‘risida ma’lumotnomalar va ko‘knori o‘simligiga o‘xshash o‘simlik boshoqlari topilib, ashyoviy dalil sifatida rasmiylashtirib olingan.
Shuningdek, B.M.ning akasi V.M.ning ishonchiga kirib, uni aldab, nomiga pensiya uchun AT “Xalq banki” Angren filialidan plastik kartochkasi rasmiylashtirib, ushbu holatlarni V.M.dan yashirib kelgan. Shuningdek, 2018-yilning 1-sentabridan 2020-yilning 21-sentabrigacha fuqaro V.M. nomiga hisoblangan jami 10 million 987 ming 167 so‘m miqdoridagi pensiya pullarni plastik karta orqali olib, o‘zining shaxsiy ehtiyojlariga sarflab yuborgan.
Lekin uning akasi ijtimoiy tarmoqlarda va Ohangaron tuman prokurori nomiga yozgan murojaatlarida ukasi B.M. Ohangaron tuman prokurori o‘rinbosari va tergovchisi bilan urishib qolganligi sababli ukasiga nisbatan noqonuniy ravishda qo‘zg‘atilgan jinoyat ishi bo‘yicha qamoq ehtiyot chorasi qo‘llanilganligini ma’lum qilgan. Shuningdek, B.M.ning onasi 7-oktabr kuni tuman prokuraturasiga kelib, tuman prokuraturasi xodimlarini haqoratlab, o‘g‘liga nisbatan qo‘llanilgan qamoqqa olish tarzidagi ehtiyot chorasini o‘zgartirib, uni ozodlikka chiqarishni, aks holda tuman prokuraturasi temir panjarasiga ro‘moli yordamida o‘zini osishini yoki yoqib yuborishni ta’kidlab, provakatsion harakatlarni amalga oshirgan.
B.M. doimiy ravishda tergovga qadar tekshiruv va tergov harakatlariga belgilangan tartibda chaqirtirilganda o‘zini agressiv tutib, prokuratura xodimlarini haqoratlab, ularga tuhmat qilib, sha’ni va qadr-qimmatini kamsitib kelgan.
Ta’kidlanishicha, B.M. va uning onasi yuqorida keltirilgan haqoratli murojaatlari va videolavhalar mavjud.
Toshkent viloyat IIBB tomonidan berilgan ma’lumotnomaga ko‘ra, B.M.ning onasi va akasi muqaddam Ma’muriy javobgarlik to‘g‘risidagi kodeksning 183-moddasi (mayda bezorilik) hamda 194-moddasi (ichki ishlar organlari xodimining qonuniy talablarini bajarmaslik) 1-qismi bilan ma’muriy huquqbuzarlikka tortilganligi ko‘rsatilgan.
Ularning tuman prokurori o‘rinbosariga tuhmat qilib, haqoratlagani yuzasidan o‘tkazilgan tergovga qadar tekshiruv harakatlari natijasiga ko‘ra, 5-noyabr kuni Jinoyat-protsessual kodeksining 83-moddasi (reabilitatsiya uchun asoslar) 2-bandiga ko‘ra, jinoyat ishini qo‘zg‘atish rad qilinib, ma’muriy javobgarlikka oid ish qo‘zg‘atilgan.
Avvalroq Andijonda qizining o‘limiga sababchi yigitdan Spark undirilmayotganligidan norozi ona prokuratura binosi oldida o‘zini yoqib yuborgan edi.
Izoh (0)