Toshkent shahar hokimligi “Toshkent shahrida ichimlik suv ta’minoti va oqova suv xizmatlari uchun tartibga solinadigan narxlarni belgilash chora-tadbirlari to‘g‘risida”gi qaror loyihasi bilan “Toshkent shahar suv ta’minoti” MChJning hozirgi kunda amalda bo‘lgan tarifini oshirishni taklif etmoqda.
Jamoatchilik muhokamasi uchun e’lon qilingan hujjat loyihasida qayd etilishicha, “Toshkent shahar suv ta’minoti” MChJ 2019-yilda moliyaviy iqtisodiy faoliyatdan 58,8 milliard so‘m hamda 2020-yilning 8 oyida 21,3 milliard so‘m zarar ko‘rgan.
Jamiyatning moliyaviy ahvolidan kelib chiqib, jamiyat tomonidan taqdim qilinayotgan ichimlik suvi va kanalizatsiya xizmati uchun ishlab chiqilgan tariflarni qaytadan ko‘rib chiqish uchun ishchi guruh tuzilishi so‘ralmoqda.
Yangi taklif etilayotgan tariflarda quyidagi narx darajalarini belgilash taklif etilayapti.
1 kub metr ichimlik suvi uchun tariflar:
- aholi, budjet va ulgurji iste’molchilar uchun (qo‘shimcha qiymat solig‘isiz) 310 so‘mdan 500 so‘mga (161,2 foiz);
- tijorat tashkilotlari uchun 730 so‘mdan 1500 so‘mga (205,4 foiz) o‘sishi;
- aholi, budjet va ulgurji iste’molchilar uchun (qo‘shimcha qiymat solig‘isiz) 250 so‘mdan 350 so‘mga (140 foiz);
- tijorat tashkilotlari uchun 460 so‘mdan 820 so‘mga (178,2 foiz) o‘sishi kutilmoqda.
Ichimlik suvi yetkazib berish 2018-yilda jami 794 million kub metrni tashkil etgan bo‘lsa, 2019-yilda 696 million metr kubga qisqartirildi (ichimlik suvi hajmi 98 ming m3 ga yoki 12,4 foizga qisqartirilgan). Shuningdek, 2019-yilda ichimlik suvi tarmoqlarida 11 155 ta nosozlik bartaraf etilgan. Bu ko‘rsatkich 2020-yilning 1-sentabr xolati bo‘yicha 7430 tani tashkil etmoqda.
Avvalroq Navoiyda ichimlik suvi va kanalizatsiya xizmati narxi qariyb 3 baravar oshirilishi ma’lum bo‘lgandi.
Izoh (0)