O‘zbekiston Prezidenti Shavkat Mirziyoyev 15-dekabr, seshanba kuni “Toshkent shahrida maishiy va qurilish chiqindilari bilan bog‘liq ishlarni amalga oshirishni takomillashtirish chora-tadbirlari to‘g‘risida”gi qarorni imzoladi. Bu haqda Telegram’dagi “Huquqiy axborot” kanali xabar berdi.
Davlat ekologiya qo‘mitasi boshqarma boshlig‘i o‘rinbosari Jamshid Ischanovning ma’lum qilishicha, hujjatga ko‘ra, 2021-yil 1-aprelga qadar Vazirlar Mahkamasiga qattiq maishiy chiqindilarni yig‘ish va olib chiqish ketish xarajatlarini iste’molchilar tomonidan iste’mol qilinadigan elektr energiyasi tariflariga kiritish mexanizmlarini amalga oshirish bo‘yicha asosli takliflarni kiritish topshirilgan.
Ta’kidlanishicha, ushbu qaror “debitor qarzdorlikni kamaytirish uchun” yo‘naltirilgan.
Maqsadli ko‘rsatkichlarga muvofiq 2020-yil 31-dekabrga borib Toshkentda maishiy chiqindilarni yig‘ish va olib chiqib ketish borasida ko‘rsatilayotgan xizmatlar bo‘yicha debitor qarzdorlik 38,7 milliard so‘mni tashkil etadi. 2021-yil 1-iyulga borib qarzdorlikni 33,2 milliard so‘mga, 31-dekabrga borib 20 milliard so‘mga, 2022-yil 31-dekabrga qadar esa 10 milliard so‘mga tushirish rejalashtirilgan.
Ayni vaqtda maishiy chiqindilarni olib chiqib ketish tarifi kishi boshiga oyiga 4,5 ming so‘mni tashkil etadi.
Avvalroq maishiy chiqindilar bilan bog‘liq ishlarni amalga oshirishda davlat-xususiy sherikchiligining yangi modeli joriy etilayotgani to‘g‘risida xabar berilgandi.
Izoh (0)