O‘zbekistonda tuhmat va haqorat uchun yengilroq jazolar belgilanishi kutilmoqda
Oliy Majlis Qonunchilik palatasi deputatlari 15-dekabr kuni bo‘lib o‘tgan navbatdagi majlisda Jinoyat, Jinoyat-protsessual kodekslariga hamda Ma’muriy javobgarlik to‘g‘risidagi kodeksga o‘zgartish va qo‘shimchalar kiritish to‘g‘risidagi qonun loyihasini qabul qildi. Bu haqda Parlament matbuot xizmati xabar berdi.
“Gazeta.uz”ning yozishicha, Jinoyat kodeksining 139-modda 2-qismi (tuhmat) bilan OAV va internet orqali tarqatilgan tuhmat uchun belgilangan jazo yengillashtiriladi. Kelajakda ushbu qonunbuzarlik uchun BHMning 200 dan 400 baravarigacha jarima yoki 300 dan 360 soatgacha majburiy jamoat ishlariga yoki 2 yildan 3 yilgacha axloq tuzatish ishlariga jalb etish yoki bir yilgacha ozodlikni cheklash bilan jazolanishi mumkin. Hozircha ushbu moddaga ko‘ra, bir yilga qadar ozodlikdan mahrum etish jazosi belgilangan.
Mazkur moddaning 3-qismiga ko‘ra, hozirda turli xil og‘irlashtiruvchi holatlarda tuhmat qilish — 1 yildan 3 yilgacha ozodlikni cheklash yoki uch yilgacha ozodlikdan mahrum qilish bilan jazolanadi. Deputatlar tomonidan ma’qullangan o‘zgartirishlarga ko‘ra, ushbu sanksiyalar BHMning 300 baravaridan 500 baravarigacha jarimaga tortish yoki 360 dan 400 soatgacha jamoat ishlariga jalb etish yoki 1 yildan 3 yilgacha ozodlikni cheklashni nazarda tutadi.
O‘zgartirish Jinoyat kodeksining 140-modda 3-qismiga (haqorat qilish) ham taalluqli — jabrlanuvchini o‘z xizmat yoki fuqarolik burchini bajarishi munosabati bilan bog‘liq holda haqorat qilganlik uchun belgilangan bir yilgacha ozodlikdan mahrum etish jazosi olib tashlanmoqda.
Bundan tashqari, qonun loyihasi bilan Ma’muriy javobgarlik to‘g‘risidagi kodeksga zo‘ravonlik va shafqatsizlikni targ‘ib qiluvchi axborotni ommaviy axborot vositalari, telekommunikatsiya yoki internet tarmoqlariga joylashtirganlik uchun javobgarlikni belgilash nazarda tutilmoqda.
Qabul qilingan hujjat Senat tomonidan ko‘rib chiqilishi uchun yuborilgan.
