Toshkentda 2021-yildan chiqindilarni saralab yig‘ish boshlanadi

Prezident Shavkat Mirziyoyev “Toshkent shahrida maishiy va qurilish chiqindilari bilan bog‘liq ishlarni amalga oshirishni takomillashtirish chora-tadbirlari to‘g‘risida”gi qarorni imzoladi. Bu haqda Telegram’dagi “Huquqiy axborot” kanali xabar berdi.

Qarorga ko‘ra, Davlat ekologiya qo‘mitasi tizimidagi “Maxsustrans” davlat unitar korxonasi va “Chiqindilarni qayta yuklash va utilizatsiya qilish” davlat korxonasi Toshkent shahar hokimligi tizimiga o‘tkaziladi.

“Maxsustrans” davlat unitar korxonasi ishtirokida chiqindilar bilan bog‘liq ishlar davlat-xususiy sheriklik asosida tashkil etiladi. Toshkent shahridagi chiqindilarni boshqarish sohasining maqsadlariga quyidagilar kiradi:

• qattiq maishiy chiqindilarni qayta ishlash darajasini hozirgi 8 foizdan 30 foizga qadar ko‘tarish;
• qattiq maishiy chiqindilarni yig‘ish va olib chiqib ketish xizmatlarini tashkillashtirish sohasida xususiy sektor ulushini 100 foizga qadar oshirish;
• aholiga ko‘rsatilgan qattiq maishiy chiqindilarni to‘plash va olib chiqib ketish xizmatidagi debitor qarzdorlikni 75 foizga kamaytirish.

• 1-bosqichda (2021-yilda) — Toshkent shahar hokimligi tomonidan belgilanadigan mahalla fuqarolar yig‘inlari hududida chiqindilarni “qayta ishlanadigan” va “qayta ishlanmaydigan” toifalarga ajratgan holda yig‘ish;
• 2-bosqichda (2022-yilda) — “Maxsustrans” davlat unitar korxonasi tomonidan xizmat ko‘rsatiladigan barcha hududlardagi yakka tartibdagi turar-joy sektorida qattiq maishiy chiqindilarni “qayta ishlanadigan” va “qayta ishlanmaydigan” toifalarga ajratgan holda yig‘ish;
• 3-bosqichda (2023-yildan boshlab) — barcha tumanlarda chiqindilarni “qayta ishlanadigan”, “qayta ishlanmaydigan”, “organik”, “xavfli maishiy chiqindilar” va boshqa toifalarga ajratgan holda yig‘ish.

Chiqindilarni olib chiqib ketish tariflari iste’molchilar tomonidan chiqindilar saralab yig‘ilganligini inobatga olib pasaytirilgan holda belgilanadi.

Avvalroq Toshkentda maishiy chiqindi va elektr energiyasi tariflari birlashtirib yuborilishi mumkinligi to‘g‘risida xabar berilgandi.