Oliy Majlis Qonunchlik palatasi deputatlari Ma’muriy javobgarlik to‘g‘risidagi kodeks va Jinoyat kodeksiga yolg‘on ma’lumot tarqatganlik uchun sanksiyalarni nazarda tutuvchi qonun loyihasini ma’qulladi. Bu haqda Parlament matbuot xizmati xabar berdi.
“Gazeta.uz”ning yozishicha, Ma’muriy javobgarlik to‘g‘risidagi kodeksga kiritilgan o‘zgartirishlarga ko‘ra, shaxsning sha’ni va qadr-qimmatini qasddan kamsitishga olib kelgan yolg‘on axborot uchun BMHning 50 barobari miqdorida jarima belgilanadi, jamoat tartibi yoki xavfsizligiga xavf tug‘diradigan yolg‘on ma’lumotlarni tarqatganlik uchun BHMning 50 barobaridan 100 barobarigacha jarima belgilanishi kutilmoqda.
Taklif etilayotgan loyihada shaxs shunday harakatlari uchun muqaddam ma’muriy javobgarlikka tortilganidan keyin 1 yil davomida takroran sodir etsagina jinoiy javobgarlikka tortilishi belgilanmoqda. Unga ko‘ra, shaxsning sha’ni va qadr-qimmatini kamsitadigan yolg‘on axborotni tarqatganlik uchun BMHning 150 barobari miqdorida jarima yoki 240 soatgacha jamoat ishlariga yoki 2 yilgacha axloq tuzatish ishlariga jalb etish yoki 2 yilgacha ozodlikdan cheklash nazarda tutilgan.
Bundan tashqari, jamoat tartibiga xavf tug‘diradigan yolg‘on ma’lumotlarni tarqatganlik uchun BHMning 200 barobarigacha jarima belgilash yoki 300 soatgacha jamoat ishlariga yoki 2 yilgacha axloq tuzatish ishlariga jalb etish yoki 2 yil ozodlikda cheklash taklif etilmoqda.
Bu kabi xatti-harakatlar katta miqdorda zarar yetkazsa, jarima miqdori 200 dan 4000 barobargacha belgilanishi yoki 2 yildan 3 yilgacha ozodlikdan cheklanishi mumkin. Ommaviy tadbirlar yoki favqulodda vaziyatlarda sodir bo‘lsa — 3 yildan 5 yilgacha ozodlikdan cheklanishi yoki 3 yildan 5 yilgacha ozodlikdan mahrum etilishi mumkin.
Avvalroq O‘zbekiston Jinoyat kodeksidan tuhmat va haqorat qilganlik uchun ozodlikdan mahrum qilish jazosi olib tashlanishi kutilayotgani to‘g‘risida xabar berilgandi.
Izoh (0)