Тошкент вилояти прокуратураси ижтимоий тармоқларда ўғлига нисбатан қўлланилган қамоқ жазоси ўзгартирилмаса, ўзини ёқиб юбориш билан таҳдид қилиб келган аёл тўғрисидаги хабарларга муносабат билдирди.
Маълумотларга кўра, Б.М. исмли шахс 2017 йил март ойида В.М. исмли фуқарони яшаш учун бошпанаси йўқлигидан фойдаланиб, уни хонадонига олиб келган. Унга бошпана берганлиги учун ўзига қарам қилиб, текинга ёлланма ишчи сифатида ишлатиб келган ва унинг шахсига оид барча ҳужжатларини олиб қўйиб, хизмат ҳақи бермаган.
Икки нафар фуқаронинг аризаси юзасидан ҳолат бўйича 23 сентябрь куни Оҳангарон туман ИИБ ҳузуридаги тергов бўлими томонидан жиноят иши қўзғатилган. 24 сентябрь куни прокурорнинг тинтув ўтказиш ҳақидаги санкцияси билан видеотасвирга олинган ҳолда Б.М.нинг яшаш хонадонидан В.М.нинг фуқаролик паспорти, жамғариб бориладиган пенсия дафтарчаси, нотариал тартибда расмийлаштирилган ишончнома, иш ҳақи тўғрисида маълумотномалар ва кўкнори ўсимлигига ўхшаш ўсимлик бошоқлари топилиб, ашёвий далил сифатида расмийлаштириб олинган.
Шунингдек, Б.М.нинг акаси В.М.нинг ишончига кириб, уни алдаб, номига пенсия учун АТ «Халқ банки» Ангрен филиалидан пластик карточкаси расмийлаштириб, ушбу ҳолатларни В.М.дан яшириб келган. Шунингдек, 2018 йилнинг 1 сентябридан 2020 йилнинг 21 сентябригача фуқаро В.М. номига ҳисобланган жами 10 миллион 987 минг 167 сўм миқдоридаги пенсия пулларни пластик карта орқали олиб, ўзининг шахсий эҳтиёжларига сарфлаб юборган.
Лекин унинг акаси ижтимоий тармоқларда ва Оҳангарон туман прокурори номига ёзган мурожаатларида укаси Б.М. Оҳангарон туман прокурори ўринбосари ва терговчиси билан уришиб қолганлиги сабабли укасига нисбатан ноқонуний равишда қўзғатилган жиноят иши бўйича қамоқ эҳтиёт чораси қўлланилганлигини маълум қилган. Шунингдек, Б.М.нинг онаси 7 октябрь куни туман прокуратурасига келиб, туман прокуратураси ходимларини ҳақоратлаб, ўғлига нисбатан қўлланилган қамоққа олиш тарзидаги эҳтиёт чорасини ўзгартириб, уни озодликка чиқаришни, акс ҳолда туман прокуратураси темир панжарасига рўмоли ёрдамида ўзини осишини ёки ёқиб юборишни таъкидлаб, провакацион ҳаракатларни амалга оширган.
Б.М. доимий равишда терговга қадар текширув ва тергов ҳаракатларига белгиланган тартибда чақиртирилганда ўзини агрессив тутиб, прокуратура ходимларини ҳақоратлаб, уларга туҳмат қилиб, шаъни ва қадр-қимматини камситиб келган.
Таъкидланишича, Б.М. ва унинг онаси юқорида келтирилган ҳақоратли мурожаатлари ва видеолавҳалар мавжуд.
Тошкент вилоят ИИББ томонидан берилган маълумотномага кўра, Б.М.нинг онаси ва акаси муқаддам Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-моддаси (ички ишлар органлари ходимининг қонуний талабларини бажармаслик) 1-қисми билан маъмурий ҳуқуқбузарликка тортилганлиги кўрсатилган.
Уларнинг туман прокурори ўринбосарига туҳмат қилиб, ҳақоратлагани юзасидан ўтказилган терговга қадар текширув ҳаракатлари натижасига кўра, 5 ноябрь куни Жиноят-процессуал кодексининг 83-моддаси (реабилитация учун асослар) 2-бандига кўра, жиноят ишини қўзғатиш рад қилиниб, маъмурий жавобгарликка оид иш қўзғатилган.
Аввалроқ Андижонда қизининг ўлимига сабабчи йигитдан Spark ундирилмаётганлигидан норози она прокуратура биноси олдида ўзини ёқиб юборган эди.
Изоҳ (0)