Uy, oila, mashinalar va Messi bilan do‘stlik. Argentinalik “farishta” Anxel di Mariya qanday hayot kechiradi?

Faoliyati davomida faqat top-klublarda (“Benfika”, “Real”, “Manchester Yunayted”, PSJ ) to‘p surgan Anxel di Mariya super yulduz darajasiga chiqmagan bo‘lsa-da, yetarli darajada yutuq va mashhurlikka erishgan. Ham yashil maydon, ham uning tashqarisidagi beozor harakatlari uchun “farishta” laqabini olgan Anxel og‘ir bolalikni o‘tkazgan. Hozirda esa uning hayotiga faqat havas qilish mumkin. To‘g‘ri anglaganingizdek, quyida Anxel di Mariyaning hashamatli hayoti haqida hikoya qilamiz.

Uyi

2015-yildan beri PSJ sharafini himoya qilib kelayotgan di Mariya Parijning qoq markazida istiqomat qiladi. Garchi uyning fotosuratlari kam (deyarli yo‘q) bo‘lsa-da, uning 2 qavatli va 12 ta xonadan iborat ekanligi ma’lum. Undan ulkan oshxona, bir qancha yotoqxona va mehmonxonalar o‘rin olgan. Shuningdek, Anxel uyida o‘zi erishgan yutuqlarni saqlaydigan burchak ham tashkil qilgan. Uyning qiymati 2 million yevroga baholanadi. Uning Manchesterdagi sotib yuborgan koshonasi esa naq 5,5 million yevro turardi.

Mashinalari

Argentinalik vinger naq 4 ta hashamatli avtoulovga egalik qiladi. Uning ilk mashinasi Lamborghini Huracan bo‘lgan bo‘lsa, ikkinchisi Aston Martin Vantage’dir.

Shuningdek, Anxelning garajidan Porsche 911 Carrera va Range Rover Sport’ni ko‘rish mumkin.

Shaxsiy hayoti

Di Mariya 2011-yilda o‘zidan besh yoshga katta Xorxelina Kardoso ismli qizga uylanadi. Aytishlaricha, Xorxelina turmush o‘rtog‘i tomon yangragan har qanday tanqidni juda jiddiy qabul qiladi. Juftlik hozirda ikki nafar qiz farzandni voyaga yetkazmoqda.

Do‘stlari

Anxel oilaparvar inson bo‘lgani uchun uning do‘stlari soni unchalik ham ko‘p emas. U bo‘sh vaqtlarini asosan oilasi davrasida o‘tkazadi.

Shunga qaramay, uning eng yaqin do‘stlaridan biri, bu Lionel Messi. Ular birgalikda Argentina terma jamoasi sharafini himoya qiladi va tez-tez qo‘ng‘iroqlashib turadi. Yozgi ta’tillarda esa birgalikda oilaviy hordiq chiqarishadi.

Shuningdek, u “Manchester Yunayted”ga o‘tib ketgan Edinson Kavani bilan ham iliq do‘stlik aloqalariga ega. Ular maydondan tashqarida ham bir-biri bilan tez-tez ko‘rishib turgan.

Futboldan tashqari qiziqishlar

Yuqorida ta’kidlanganidek, di Mariya imkon qadar oilasi bilan vaqt o‘tkazishni va qizlari hamda rafiqasi bilan dunyo bo‘ylab sayohat qilishni yoqtiradi. Shuningdek, uning ijtimoiy tarmoqlardagi sahifalariga nazar tashlansa, Anxelning tanovul qilishni (garchi, bu uning tashqi ko‘rinishida umuman bilinmasa ham) xush ko‘rishini payqash mumkin.

Daromadi

Di Mariyaning yulduzli PSJ bilan amaldagi shartnomasi 2021-yilning yozida o‘z nihoyasiga yetadi. Bitimga ko‘ra, uning yillik maoshi bonuslar bilan birga 20,5 million yevroni tashkil qiladi. Bundan tashqari futbolchining Adidas kompaniyasi bilan shartnomasi mavjud. Unga ko‘ra, Anxel yiliga yana 2 million yevro qo‘shimcha daromad ko‘radi.