Уй, оила, машиналар ва Месси билан дўстлик. Аргентиналик «фаришта» Анхель ди Мария қандай ҳаёт кечиради?

Фаолияти давомида фақат топ-клубларда («Бенфика», «Реал», «Манчестер Юнайтед», ПСЖ ) тўп сурган Анхель ди Мария супер юлдуз даражасига чиқмаган бўлса-да, етарли даражада ютуқ ва машҳурликка эришган. Ҳам яшил майдон, ҳам унинг ташқарисидаги беозор ҳаракатлари учун «фаришта» лақабини олган Анхель оғир болаликни ўтказган. Ҳозирда эса унинг ҳаётига фақат ҳавас қилиш мумкин. Тўғри англаганингиздек, қуйида Анхель ди Мариянинг ҳашаматли ҳаёти ҳақида ҳикоя қиламиз.

Уйи

2015 йилдан бери ПСЖ шарафини ҳимоя қилиб келаётган ди Мария Парижнинг қоқ марказида истиқомат қилади. Гарчи уйнинг фотосуратлари кам (деярли йўқ) бўлса-да, унинг 2 қаватли ва 12 та хонадан иборат эканлиги маълум. Ундан улкан ошхона, бир қанча ётоқхона ва меҳмонхоналар ўрин олган. Шунингдек, Анхель уйида ўзи эришган ютуқларни сақлайдиган бурчак ҳам ташкил қилган. Уйнинг қиймати 2 миллион еврога баҳоланади. Унинг Манчестердаги сотиб юборган кошонаси эса нақ 5,5 миллион евро турарди.

Машиналари

Аргентиналик вингер нақ 4 та ҳашаматли автоуловга эгалик қилади. Унинг илк машинаси Lamborghini Huracan бўлган бўлса, иккинчиси Аston Martin Vantage’дир.

Шунингдек, Анхелнинг гаражидан Porsche 911 Carrera ва Range Rover Sport’ни кўриш мумкин.

Шахсий ҳаёти

Ди Мария 2011 йилда ўзидан беш ёшга катта Хорхелина Кардосо исмли қизга уйланади. Айтишларича, Хорхелина турмуш ўртоғи томон янграган ҳар қандай танқидни жуда жиддий қабул қилади. Жуфтлик ҳозирда икки нафар қиз фарзандни вояга етказмоқда.

Дўстлари

Анхель оилапарвар инсон бўлгани учун унинг дўстлари сони унчалик ҳам кўп эмас. У бўш вақтларини асосан оиласи даврасида ўтказади.

Шунга қарамай, унинг энг яқин дўстларидан бири, бу Лионель Месси. Улар биргаликда Аргентина терма жамоаси шарафини ҳимоя қилади ва тез-тез қўнғироқлашиб туради. Ёзги таътилларда эса биргаликда оилавий ҳордиқ чиқаришади.

Шунингдек, у «Манчестер Юнайтед»га ўтиб кетган Эдинсон Кавани билан ҳам илиқ дўстлик алоқаларига эга. Улар майдондан ташқарида ҳам бир-бири билан тез-тез кўришиб турган.

Футболдан ташқари қизиқишлар

Юқорида таъкидланганидек, ди Мария имкон қадар оиласи билан вақт ўтказишни ва қизлари ҳамда рафиқаси билан дунё бўйлаб саёҳат қилишни ёқтиради. Шунингдек, унинг ижтимоий тармоқлардаги саҳифаларига назар ташланса, Анхелнинг тановул қилишни (гарчи, бу унинг ташқи кўринишида умуман билинмаса ҳам) хуш кўришини пайқаш мумкин.

Даромади

Ди Мариянинг юлдузли ПСЖ билан амалдаги шартномаси 2021 йилнинг ёзида ўз ниҳоясига етади. Битимга кўра, унинг йиллик маоши бонуслар билан бирга 20,5 миллион еврони ташкил қилади. Бундан ташқари футболчининг Adidas компанияси билан шартномаси мавжуд. Унга кўра, Анхель йилига яна 2 миллион евро қўшимча даромад кўради.