“Ufa” rahbari Sergey Yuranning gaplari haqida: “Oston O‘runov yosh, shu sabab u hali buyuk futbolchi bo‘lolmadi”

“Ufa” futbol klubi direktorlar kengashi rahbari Rostislav Murzagulov “SKA-Xabarovsk” bosh murabbiyi Sergey Yuranning o‘zbekistonlik yarim himoyachi Oston O‘runov haqidagi gaplariga munosabat bildirdi.

Avvalroq Yuran O‘runov ko‘rsatilganidan 4-5 yoshga kattaligini aytgandi.

“Sergey Yuran — futbol olamida ulkan obro‘ga ega shaxs, biroq o‘ylashimcha, gerontologiyada (tirik organizmlar, jumladan, odamning qarish jarayonini o‘rganadigan fan — izoh “Daryo”) undan kuchliroq mutaxassislar bor. Ostonga hatto chetdan qarasangiz ham, uning ancha yosh ekani yaqqol ko‘rinadi. Aynan shuning uchun u hali buyuk futbolchi bo‘lolmadi.

Yuran aytgan yoshga yetganida Oston haqiqatda katta o‘yinchiga aylanadi. Yuranga esa hozirgi klubida muvaffaqiyatlar tilayman”, — deydi Murzagulov.

O‘runov 2019/20-yilgi mavsumning ikkinchi yarmida “Ufa” safida RPLda 10 o‘yin o‘tkazgan. Yozgi transfer oynasida 19 yoshli futbolchi Moskvaning “Spartak” jamoasiga o‘tgandi.

Oston Rossiya chempionati 2020/21-yilgi mavsumida 8 ta o‘yinda maydonga tushdi (bir marta asosiy tarkibda) va birorta ham samarali harakat amalga oshira olmadi.