“Forsaj 5” filmini suratga olish uchun avtomobillarning maxsus nusxalari yaratilgan va tryuklarning aksariyati kompyuter grafikasi yordamida amalga oshirilgan bo‘lishiga qaramay, suratga olish ishlari Universal Studios kinostudiyasi uchun qimmatga tushgan, deb yozadi CARakoom.
“Forsaj” franshizasining dastlabki uchta filmiga texnik konsultantlik qilgan Kreyg Liberman 5-qismdagi quvish poygasi qay tarzda yaratilganini so‘zlab berdi. Universal kinofranshizaning beshinchi qismini suratga olish uchun 125 million dollar ajratgan va ularning katta qismi poyezdda o‘g‘irlik sodir etish sahnasi uchun sarflangan. Prodyuserlar o‘zlari uchun maxsus temiryo‘l qurgan va suratga olishda o‘z vagonlaridan foydalangan.
Ushbu sahnada ishtirok etgan avtomobillarning deyarli barchasi nusxa bo‘lgan. Studiya haqiqiy retro-avtomobillarni yakson qilish orqali pul sarflash yoki muxlislar ko‘nglini sindirishni istamagan. Shu sababli original modellarning juda aniq nusxalari yaratilgan.
Chevrolet Corvette Roadster — 12 dona — mazkur epizod uchun uning nusxalarini yaratgan Mongoose Motorsports’dan xarid qilingan. Ularning beshtasidan kaskadyorlik sahnalarida foydalanilgan. Uchtasi maxsus pnevmatik pushkaning snaryadiga aylangan. Ular qoyadan daryoga, shuningdek, poyezd vagonidan tashlab yuborilgan. Yana ikkitasiga Volkswagen Bettle shassisi o‘rnatilgan va ular notekis yo‘llarda harakatlanishga moslashtirilgan.
Libermanning so‘zlariga ko‘ra, “Forsaj 5” prokatda sarflangan mablag‘dan besh barobar ko‘p — 626 million dollar to‘plagan.
Avvalroq “Forsaj” franshizasi 11-filmdan so‘ng yakunlanishi to‘g‘risida xabar berilgandi.
Izoh (0)