“KamAZ” kompaniyasi Moskvada “Kama-1” ishchi nomi ostidagi elektromobilini taqdim etdi. Taqdimot 10-dekabr kuni “Vuzpromekspo-2020” ko‘rgazmasida bo‘lib o‘tgan, deb xabar beradi Meduza.
Elektromobilni yaratish ustidagi ishlar 2018-yilda boshlangan. Uning loyihasi Sankt-Peterburg politexnika universiteti tomonidan tayyorlangan. Kompaniyaning ma’lum qilishicha, elektromobil hozircha sanoat seriya oldi nusxasi maqomida va u barcha sinov hamda sertikatsiya jarayonlaridan o‘tgan.
Uch eshikli “Kama-1” krossoveri to‘rt kishiga mo‘ljallangan. U bir marta quvvatlanish orqali 250 kilometr yo‘l bosa oladi, soatiga 150 kilometr tezlikda esa bir soat harakatlanadi va 50 daraja sovuqqa ham bardoshli. Mashinaning 100 km/soat tezlikka erishishi uchun 6,7 soniya kifoya. Avtomobil uzunligi 3,4 metrni, eni — 1,7 metrni, balandligi — 1,6 metrni, kliners — 160 millimetrni tashkil etadi. Rossiya avtomobil nashrlari yangi modelni “KamAZ” tomonidan ishlab chiqarilgan “Oka”ga qiyoslamoqda.
Elektromobil 33 kilovatt-soat sig‘imga ega akkumulyator va 80 kilovattli elektrodvigatelga ega bo‘lgan. Akkumulyatorning to‘liq quvvatlanishi uchun olti soat kerak (70-80 foiz — 20 daqiqada). Shuningdek, “Kama-1” uchinchi darajali ADAS elektron tizimi bilan jihozlangan bo‘lib, u haydovchiga mashinani boshqarish yoki avtoturargohga joylashtirishga yordam beradi.
Elektromobil narxi 1 million rubl atrofida (13,7 ming dollar). Taqqoslash uchun: eng arzon Tesla elektromobili — Model 3’ning AQShdagi narxi 37 990 dollarni tashkil etadi. “Kama-1” savdolari 2021-yildan boshlanishi kutilmoqda. Ishlab chiqaruvchi yiliga 20 mingga yaqin shu turdagi modelni sotishni reja qilgan.
Izoh (0)