Surxondaryodagi ta’mirlanayotgan yo‘lda Cobalt ag‘darilib ketdi. Haydovchi voqea joyida vafot etdi

Surxondaryoda Cobalt avtomashinasi ta’mirlash ishlari olib borilayotgan yo‘lda tezligini oshirgani sabab yo‘l-transport hodisasi sodir bo‘ldi, deya xabar qiladi YHXBB.

Qayd etilishicha, 2020-yil 10-dekabr kuni soat 21:30 larda Sherobod tumani “Oltin voha” mahallasi hududidan o‘tuvchi xalqaro ahamiyatga ega bo‘lgan M-39 avtomobil yo‘lining 1415-kilometrida Cobalt rusumli avtomashina haydovchisi Termiz—Toshkent yo‘nalishida boshqarib kelib, yo‘lning qurilish ishlari olib borilayotgan hududida avtomashina tezligini oshirib harakatlangan. Buning natijasida avtomobil yo‘l chekkasiga chiqib ketib, YTH sodir etgan.

Oqibatda avtomashina haydovchisi olgan tan jarohatlari natijasida hodisa joyida vafot etdi.

Hodisa yuz bergan vaqtda avtomashina ichida bo‘lgan yo‘lovchi bilan dastlabki surishtiruv harakatlari olib borilmoqda. Hozirgi kunda holat yuzasidan Jinoyat kodeksining 266-moddasi 2-qismiga (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) asosan jinoyat ishi qo‘zg‘atilib, dastlabki tergov harakatlari olib borilmoqda.

Mutasaddilar tomonidan hodisa sababi o‘rganildi. Unga ko‘ra, hodisaga haydovchining tezlikni oshirgani hamda yo‘lning ta’mirlanayotgan hududi tungi yoritish chiroqlari bilan jihozlanmagani sabab bo‘lgan.

Avvalroq Surxondaryoda teplovoz Matiz’ni urib yuborishi oqibatida avtomobil haydovchisi voqea joyida vafot etgani, Ishtihonda Matiz va Nexia’ning to‘qnashishi oqibatida haydovchilardan biri vafot etgani hamda Navoiyda Matiz ag‘darilib ketishi natijasida haydovchi halok bo‘lgani haqida xabar berilgandi.