Qamchiq dovonida 14 soat davomida 13 ta mashina qatnashgan yo‘l-transport hodisalari sodir bo‘ldi, deya xabar qilmoqda Favqulodda vaziyatlar vazirligi.
Qayd etilishicha, 2020-yilning 13-dekabr kuni soat 19:00 dan 14-dekabr kuni soat 09:00 ga qadar A-373 Toshkent—O‘sh avtomobil yo‘lining 258, 259 va 265-kilometr hududlarida jami 3 ta holatda 13 ta turli rusumdagi avtotransport vositalarining muzlama yo‘llarda boshqaruvni yo‘qotishi yo‘l-transport hodisalariga sabab bo‘lgan.
Voqea joyiga FVV “Qamchiq” maxsus qidiruv, yong‘in-qutqaruv boshqarmasi va boshqa tegishli tashkilot xodimlari zudlik bilan yetib borib, YTH oqibatlarini bartaraf etdi.
Yuzaga kelgan vaziyatlar oqibatida tan jarohati olgan va halok bo‘lganlar yo‘q.
Favqulodda vaziyatlar vazirligi yo‘l-transport hodisalari bilan bog‘liq favqulodda vaziyatlarning oldini olish maqsadida dovon hududida harakatlanishda haydovchilardan barcha xavfsizlik choralarini ko‘rish va hushyorlikni yo‘qotmaslikni so‘ragan.
Avvalroq Namanganda 2020-yilning 11 oyi davomida 152 kishi YTH qurboni bo‘lgani, Qamchiqda 24 tonna propan olib ketayotgan yuk mashinasi ag‘darilib ketgani hamda Damas o‘zidan oldingi yuk mashinasiga urilishi oqibatida bir kishi halok bo‘lgani haqida xabar berilgandi.
Izoh (0)