Jizzaxda yo‘l patrul xizmati xodimiga qarshilik qilib, unga tan jarohati yetkazgan fuqaroga nisbatan sud hukmi o‘qildi, deya xabar bermoqda YHXBB.
Ma’lum qilinishicha, 2020-yil 11-avgust kuni Sharof Rashidov tumani hududidan o‘tgan M-39 Toshkent—Termiz avtomagistral yo‘lining 983-kilometrida “Sayohat” choyxonasi atrofida “VAZ-21063” va Nexia-3 rusumli avtomashina o‘rtasida yo‘l transport hodisasi sodir etilgan. Holat bo‘yicha chaqiruvga asosan xizmat vazifasini bajarish maqsadida viloyat IIB YHXB 3-safarbarlik guruhi YPX inspektori Komil Bo‘riyev voqea joyga yetib borgan.
Shundan so‘ng viloyat IIB YHXB xodimi Bo‘riyev sodir etilgan yo‘l transport hodisasi bo‘yicha holatga aniqlik kiritish maqsadida Nexia-3 rusumli, 10 J 371 SA davlat belgili avtomashina haydovchisi J.S.dan avtomashina hujjatlarini taqdim etishini so‘raganida, ushbu avtomashina yo‘lovchisi bo‘lgan sudlanuvchi Obid Olimov (familiya va ismi o‘zgartirilgan) ularning suhbatiga asossiz aralashgan.
Keyin Obid Olimov IIB YHXB xodimi Komil Bo‘riyevga avtomashina hujjatlarni berishni rad qilib, voqea joyidan ketishga uringan vaqtda avtomashina haydovchi o‘rindig‘iga o‘tirgan IIB YHXB xodimi Bo‘riyevga faol qarshilik ko‘rsatib, uning xizmat kiyimida bo‘lgan bodikamerasini hamda ko‘krak nishonini tortib olib, xizmat kiyimining chap yelka pogonini yulib tashlab, tugmalarini yirtib, qo‘li bilan o‘ng quloq, o‘ng yuz yuqori qismiga va o‘ng pastki jag‘ qismiga, chap yelka o‘rta qismi, ko‘krak qafasiga urgan va “sog‘lig‘ining buzilishiga olib kelmagan yengil tan jarohati yetkazgan.
Sud Obid Olimovga jazo tayinlashda aybiga to‘liq iqrorligini, qilmishidan pushaymonligini, qaramog‘ida 4 nafar voyaga yetmagan farzandi borligini, oilasida yagona boquvchiligini, jabrlanuvchiga yetkazilgan zararni o‘z ixtiyori bilan to‘liq qoplaganligini inobatga olib, uni Jinoyat kodeksining 219-moddasining 1-qismida (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) nazarda tutilgan jinoyatni sodir qilganlikda aybli deb topgan.
Ayblanuvchiga nisbatan shu modda bilan ish haqining 10 foizini davlat daromadiga ushlab qolgan holda 1 yil axloq tuzatish ishlari jazosi tayinlangan.
Avvalroq Toshkentda YPX xodimini kaltaklagan ikki sudya lavozimidan olingani, ularning sherigiga hayfsan berilgani, Samarqandda xizmat o‘tayotgan 31 yoshli IIB profilaktika inspektori Damas urib ketishi oqibatida vafot etgani hamda Oqqo‘rg‘onda YPX xodimining pogonini va kamerasini yulib olgan 3 yo‘lovchi 15 sutkaga qamalgani haqida xabar berilgandi.
Izoh (0)