Afg‘onistonlik 10 nafar ayoldan iborat birinchi guruh yaqin 2,5 yil ichida agronomiya sohasida texnik va kasb-hunar ta’limi dasturi bo‘yicha O‘zbekistonga o‘qishga keldi. Bu haqda Yevropa Ittifoqining O‘zbekistondagi delegatsiyasi matbuot xizmati xabar berdi.
Qayd etilishicha, bu afg‘on ayollarining O‘zbekistonda o‘qish uchun ta’lim grantlari orqali iqtisodiy imkoniyatlarini qo‘llab-quvvatlashga qaratilgan transchegaraviy tashabbus tufayli amalga oshirildi.
Yevropa ittifoqi tomonidan moliyalashtirilgan va BMTning Taraqqiyot dasturi (BMTTD) tomonidan amalga oshirilayotgan “Afg‘on ayollarining iqtisodiy imkoniyatlarini Qozog‘iston va O‘zbekistonda ta'lim berish va kadrlar tayyorlash orqali qo‘llab-quvvatlash” mintaqaviy loyihasi vatanida o‘qish va ish bilan ta'minlashda erkaklar bilan taqqoslaganda nomutanosib to‘siqlarga duch kelgan afg‘on ayollari uchun ta’lim imkoniyatlarini taqdim etishga qaratilgan.
Ma’lum qilinishicha, Afg‘onistondan 50 nafar ayol Qozog‘iston va O‘zbekistondagi oliy o‘quv yurtlarida tahsil oladi. Yevropa ittifoqi ushbu tashabbus uchun 2 million yevro miqdorida grant ajratdi va u BMTTD tomonidan 2020—2025-yillarda amalga oshiriladi.
“Ushbu loyihaning O‘zbekistondagi asosiy maqsadi hukumat va oliy o‘quv yurtlarining xalqaro ta’limda yaqinligi va tajribasi tufayli afg‘on ayollari uchun kasb-hunar ta’limi berishdir. Ta’limning ustuvor sohasi qishloq xo‘jaligi bo‘lib, u gender tengligini ta'minlashda alohida e’tibor kasb etadi”, — deyiladi xabarda.
Afg‘onistonlik ayollarning birinchi guruhi Termiz shahridagi Afg‘oniston fuqarolarini o‘qitish ta’lim markazida Toshkent davlat agrar universiteti ko‘magi bilan agronomiya sohasida o‘qiydi.
Ta’limning birinchi yili talabalar o‘zbek tilini o‘rganadi va kasb-hunar ta’limi dasturida yo‘nalish oladi. Afg‘oniston ayollari 2021-yil sentabrdan 2023-yil iyungacha O‘zbekiston ta’lim muassasalari bilan hamkorlikda qishloq xo‘jaligi sohasida kasb-hunar ta’limi dasturidan o‘tadi. 2023-yil iyul oyida afg‘on ayollarining birinchi guruhiga diplomlar topshiriladi.
Eslatib o‘tamiz, 2020-yilning 20-noyabrida Afg‘oniston Oliy ta’lim vazirligi va O‘zbekiston Oliy va o‘rta maxsus ta’lim vazirligi o‘rtasida afg‘on talabalarini O‘zbekistonga ta’lim olish uchun yuborish to‘g‘risida o‘zaro anglashuv memorandumini imzolash marosimi bo‘lib o‘tgandi. Imzolangan memorandumda har ikki mamlakat oliy o‘quv yurtlari o‘rtasida hamkorlik qilish, jumladan, o‘quv materiallari bilan almashish, ta’lim tadbirlarida har ikki mamlakat mutaxassislarining o‘zaro ishtirokini ta’minlash, ilmiy-tadqiqot ishlarida o‘zaro hamkorlik qilish va ilmiy jurnallarda nashr va maqolalarni birgalikda tayyorlash shartlari hamda tartibi belgilangan.
Izoh (0)