Qashqadaryoda bo‘lib o‘tgan qishloq xo‘jaligi xodimlari kunida chiroqchilik fermerga Nexia-3 avtomobili topshirildi. Bu haqda viloyat hokimligi axborot xizmati xabar berdi.
Ma’lum bo‘lishicha, Chiroqchi tumanida faoliyat yurituvchi “Jo‘ra bobo Boyqulov” fermer xo‘jaligi rahbari Xolmurod Boyqulov joriy yildagi fidokorona mehnati uchun Nexia-3 avtomashinasiga loyiq ko‘rildi.
Avtomobil kalitini fermerga viloyat hokimi Zoir Mirzayev va “Chiroqchi klaster” MChJ rahbari Oybek Qosimov topshirdi.
Tadbirda so‘z olgan viloyat rahbari Zoir Mirzayev yakuniga yetayotgan yilda viloyatda 808,6 ming tonna g‘alla, 383,4 ming tonna paxta, 714,8 ming tonna sabzavot, 187,9 ming tonna kartoshka, 315,7 ming tonna poliz mahsulotlari, 149,5 ming tonnaga yaqin meva, 2013 tonna pilla, 132,4 ming tonna go‘sht, 523,8 ming tonna sut va 270,9 million dona tuxum tayyorlashga erishilganini aytib o‘tdi.
Qo‘shimcha qilinishicha, viloyatda 2020-yilda jami bo‘lib 19 trillion 904 million so‘mlik qishloq xo‘jaligi mahsulotlari yetishtirilgan. G‘uzor tumanida ilk bor soya yetishtirilgan bo‘lsa, Chiroqchi va Koson tumanida yetishtirilgan 12,4 ming tonna tarvuz, qovun mahsulotlari chetga eksport qilingan.
Eslatib o‘tamiz, avvalroq viloyatda qishloq xo‘jaligi xodimlari kuni munosabati bilan ko‘pkari musobaqasi bo‘lib o‘tgani, unda viloyat rahbari nomidan ham sovrinlar qo‘yilgani haqida xabar berilgandi.
Izoh (0)