Amudaryo ustida Xorazmni Qoraqalpog‘iston bilan bog‘laydigan 413 metrlik ko‘prik, shuningdek, Qorao‘zak tumanidan Shovot tumanigacha 79 kilometrlik temiryo‘l qurilishi rejalashtirilmoqda. Bu haqda 13-dekabr kuni Shavkat Mirziyoyev raisligida Xorazm viloyati faollari va tarmoqlar mutasaddilari ishtirokida tashkil etilgan yig‘ilishda ma’lum bo‘lgandi.
Bundan tashqari, kelgusi uch yilda 2370 kilometr ichki yo‘llar ta’mirlanishi kutilmoqda.
“Gazeta.uz”ning yozishicha, “O‘zbekiston temir yo‘llari” aksiyadorlik jamiyati raisi Husniddin Hosilov “O‘zbekiston 24” telekanaliga bergan intervyusida Amudaryo ustida quriladigan 413 metrlik ko‘prikda avtomobil va temiryo‘l birgalikda o‘tishini ma’lum qilgan. Uning so‘zlariga ko‘ra, yangi ko‘prik yo‘lni 240 kilometrga, tashilayotgan yuklarning manzilga yetib borish vaqtini 6 soatga qisqartiradi. Bundan tashqari, ushbu ko‘prik orqali o‘tayotgan yuklarning yillik samarasi 150 milliard so‘mga yaqin bo‘lishi kutilmoqda.
“Xorazm viloyati va Qoraqalpog‘iston o‘rtasidagi temiryo‘l orqali tashilayotgan yuklarning o‘rtacha hajmi 12 million tonnani tashkil qilayotgan bo‘lsa, ko‘prik hamda temiryo‘l qurilganidan keyin yuklar hajmi loyihaning o‘zini oqlash muddatiga yetib borgunga qadar 20-25 million tonna atrofida bo‘ladi”, — degan u.
“O‘zbekiston temir yo‘llari” rahbarining so‘zlariga ko‘ra, Prezident ushbu qurilishni yanvar oyidan boshlash haqida topshiriq berdi va buning uchun zarur bo‘lgan mablag‘ni ham ajratdi.
Mavzuga doir: Xorazmda 2021-yilda 100 ta ko‘p qavatli uy quriladi
Izoh (0)