O‘zbekiston Sog‘liqni saqlash vazirligi Yangi yil tadbirlari, sayllar, bayram tomoshalari kabi odam ko‘p yig‘iladigan yig‘inlar koronavirus tarqalishi uchun sharoit yaratib berishi mumkinligidan ogohlantirdi. Vazirlik matbuot xizmati Koronavirusga qarshi kurashish shtabi a’zosi E’zozbek Rizayevning mazkur masaladagi fikrlarini taqdim etdi.
Mutaxassisning qayd etishicha, mamlakatda karantin talablarining biroz yumshatilganligi, davolanish ko‘rsatkichlarini 97 foizga yetgani koronavirus ustidan g‘alaba qozonilganini anglatmaydi. Bu hozircha ko‘rsatkichlar mo‘tadillashganini ko‘rsatadi.
Vazirlik vakili bayram chiroyli va xursandchilik bilan o‘tishini istagan holda, uni uyda, oila davrasida, ortiqcha dabdabasiz o‘tkazishni tavsiya qilgan. “O‘sha kuni mehmonga borish yoki mehmon chaqirish tavsiya etilmaydi”, — deya ma’lum qilgan E’zozbek Rizayev. Shuning uchun ham Respublika maxsus komissiyasi bayonotida viloyat, tuman va shaharlardagi bayram archalarini ochiq osmon ostida o‘rnatish tavsiya etildi.
Ta’kidlanishicha, bayram korporativ o‘tirishlari, turli xil diskotekalar ularning qatnashchilari salomatligiga jiddiy putur yetkazishi mumkin. Ayniqsa, maktabgacha ta’lim tashkilotlari, maktablar hamda oliy o‘quv yurtlarida turli bayram tadbirlari va kechalarini tashkil etish yoshlar salomatligiga jiddiy xavf soladi.
“Alkogol va tamaki mahsulotlarini ko‘p iste’mol qilish esa nishon a’zolarimiz o‘pka, jigar va buyrakning shikastlanishiga olib keladi. Bu holat esa immun tizimimizning susayishi va kasallikka chalinishi, shuningdek, kasalliklarni tez tarqalib ketishiga sabab bo‘lishi mumkin”, — dedi shtab vakili.
Sog‘liqni saqlash vazirligi dunyodagi epidemik vaziyat hamon tahlikali bo‘lib qolayotganini inobatga olib, mutaxassislarning tavsiyalariga amal qilish har kim uchun muhim ekanini eslatib o‘tdi.
“Eng asosiysi, Jahon sog‘liqni saqlash tashkilotining tavsiyalarini hamda koronavirus infeksiyasiga qarshi kurashish borasidagi xorijiy mamlakatlar ijobiy tajribasini inobatga olgan holda jamoat joylarida niqobdan foydalanishga jiddiy ahamiyat berish lozim. Respublika maxsus komissiyasining bayonotida ko‘zda tutilgan Yangi yil bayrami tadbirlarini o‘tkazish bo‘yicha tavsiyalariga amal qilish har birimizning sog‘lig‘imiz uchun nihoyatda muhimligini unutmaylik”, — deyiladi vazirlik xabarida.
Eslatib o‘tamiz, O‘zbekistonga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasining 13-dekabr kuni e’lon qilingan qaroriga ko‘ra, vazirlik, idoralar, davlat ulushi bo‘lgan korxonalar va boshqa tashkilotlariga turli xil korporativ bayram tadbirlari tashkil etish taqiqlandi. Shuningdek, o‘quvchi va talabalar ishtirokida Yangi yilga bag‘ishlangan bayram tadbirlarini o‘tkazish ham mumkin emas.
Izoh (0)