O‘zbekistonda onlayn kassalardan foydalanish tartibiga o‘zgartirish va qo‘shimchalar kiritildi. Bu haqda Davlat soliq qo‘mitasi matbuot xizmati xabar berdi.
Vazirlar Mahkamasining tegishli qarori bilan onlayn NKMlar fiskal ma’lumotlarni qog‘ozga chop etishdan oldin tekshirish va ekranda tovarlar (xizmatlar) nomlanishini aks ettirishni talab qiladigan boshqa amallarni bajarish uchun kamida TFT LCD 800*480 sig‘imli ekranga ega bo‘lishi talabi bekor qilindi.
Avvallari ko‘chma savdo faoliyatini amalga oshiruvchi tadbirkorlik subyektlari uchun bu boradagi aniq qoidalar yo‘q edi. Endilikda ular onlayn NKM yoki virtual kassalar o‘zlari ro‘yxatdan o‘tgan joy bo‘yicha tuman (shahar) davlat soliq inspeksiyalaridan mazkur nizom talablari asosida ro‘yxatdan o‘tkazilishi belgilandi.
Ya’ni endilikda onlayn NKM (virtual kassa) ishlab chiqaruvchi (import qiluvchi) korxonalar vakolatli organda ro‘yxatga olingan onlayn NKM va virtual kassa sonidan kelib chiqib, bazaviy hisoblash miqdorining ikki yuz baravaridan ikki ming baravarigacha emas, 100 baravaridan 1000 baravarigacha miqdorida (oldinlari 200 dan 2000 baravargacha edi) mablag‘larni vakolatli organning maxsus hisob raqamiga zaxiraga qo‘yadi.
Onlayn NKMlarga qo‘yilayotgan talablar takomillashtiriladi:
- onlayn NKMlar texnik jihatdan imkoniyat bo‘lganda, chek ma’lumotlari bilan joylashgan joyi bo‘yicha geolokatsiya ma’lumotlarini operatorga yuborish imkoniyatiga ega bo‘ladi;
- onlayn NKMlar 24 soat oflayn rejimida ishlagandan so‘ng ularni avtomatik bloklash tizimi joriy etiladi.
- virtual kassaga o‘zgartirish va qo‘shimchalar kiritilishi mumkin;
- fiskal ma’lumotlar, shuningdek, ularni operatorga yuborishda o‘zgartirish va qo‘shimchalar kiritilgan taqdirda operator va kiberxavfsizlik markazidan qayta xulosa olinishi shart;
- elektron tijorat orqali faoliyat yurituvchi tadbirkorlik subyektlari fiskal ma’lumotlarni operatorga uzatishni Davlat soliq qo‘mitasi tomonidan ishlab chiqilgan virtual kassa dasturiy mahsuloti orqali amalga oshirishi mumkin.
Ushbu o‘zgartirish va qo‘shimchalar mahalliy onlayn NKM ishlab chiqaruvchi korxonalarni qo‘llab-quvvatlash, sohada sog‘lom raqobat muhitini yaratish, tadbirkorlik subyektlarini ortiqcha sarf-xarajatlarini oldini olishga xizmat qiladi.
Eslatib o‘tamiz, yuqoridagi o‘zgartirish va qo‘shimchalar 2021-yil 1-martdan e’tiboran kuchga kiradi.
Avvalroq O‘zbekistonda tadbirkorlar aholidan naqd pul qabul qilishda onlayn-nazorat kassa mashinasini qo‘llashi to‘g‘risida xabar berilgandi.
Izoh (0)