G‘azoning HAMAS harakati tomonidan 2023-yil 7-oktyabr kuni Isroilga amalga oshirilgan hujumda omon qolganlar va halok bo‘lganlarning qarindoshlari Meta kompaniyasini sudga berdi. Bu haqda Arab News xabar berdi.
Da’vo qilinishicha, kompaniyaning Instagram va Facebook ijtimoiy tarmoqlari o‘sha kungi hujumni jonli efirga uzatgan. Bu da’vo Tel-Aviv okrug sudiga topshirilgan bo‘lib, unda tarmoqlar “zo‘ravonlikni jonli efirda namoyish etish vositasiga aylangani” uchun ayblanmoqda. Javobgar sifatida tilga olingan Meta’dan 4 milliard shekel (taxminan 1,17 milliard dollar) miqdorida tovon puli talab qilingan. Bu mablag‘lardan har bir jabrlanganlar uchun 200 ming shekel, har bir isroillik uchun esa 20 ming shekel ajratilishi ko‘zda tutilgan.
Da’vogarlarning aytishicha, ushbu kontentlar o‘z vaqtida o‘chirilmagan va ular haligacha ijtimoiy tarmoqlarda mavjud. Arizada Idan oilasining hikoyasi ham keltirilgan. Xususan, HAMAS jangarilari ularning uyiga bostirib kirib, garovga olgan. Oilaning to‘ng‘ich qiz farzandi Mayyan esa harbiylar tomonidan o‘ldirilgan. Yuqoridagi voqealarning barchasi harakat tomonidan Facebook’da jonli efirga uzatilgan. Oilaning otasi Sachi esa G‘azoga o‘g‘irlab ketilgan va keyinchalik o‘ldirilgan.
“Ular qizimizning o‘ldirilishi, boshqa bolalarimizning jarohatlanishi va yordam so‘rab yig‘lashimizni jonli efirga uzatdi. Facebook va Instagram shafqatsiz terror hujumini translyatsiya qilish imkonini berdi. Meta esa hali ham bu tasvirlarni olib tashlamagan”, deya onaning so‘zlaridan iqtibos keltirilgan.
Meta kompaniyasi o‘z navbatida, voqeadan jabr ko‘rgan oilalarga hamdardlik bildirib, kontentni o‘chirish uchun maxsus jamoa vakillari kecha-yu kunduz ishlayotganini ma’lum qilgan. Bu sud ishi Isroil va AQSHda HAMAS’ga yordam berganlikda ayblanayotgan shaxslar yoki tashkilotlarga qarshi ochilgan bir necha sud ishlari sirasiga kiradi.
Izoh (0)