Россияда 11 декабрь ҳолатига кўра яна 28 585 киши COVID-19’га чалингани тасдиқланди, деб хабар бермоқда Meduza вирусга қарши курашувчи штабга таяниб. Бу бир кун аввалги кўрсаткичдан 658 тага кўп.
Энг кўп касалланганлар Москва (бир суткада 7215 киши), Санкт-Петербург (3779 киши) ва Москва вилоятида (1370 киши).
Касалланганларнинг умумий сони 2 597 711 нафарга етди.
Штаб маълумотларига кўра, сўнгги бир кеча-кундузда беморларнинг яна 613 нафари инфекциядан вафот этди. Бу кузатувлар бошланганидан бери суткалик ўлимлар сони бўйича энг юқори кўрсаткич. Мамлакатда баҳордан буён жами 45 893 киши коронавирусдан вафот этган.
Соғайганларнинг умумий сони 2 059 840 нафарни ташкил қилмоқда, шу жумладан, ўтган сутка давомида касалхонадан 26 171 нафар бемор тузалиб чиққан.
Мамлакатда COVID-19’ни аниқлаш учун 81,5 миллиондан ортиқ лаборатория текшируви, шу жумладан, сўнгги 24 соат ичида 543 мингта тест ўтказилган.
Аввалроқ Россияда коронавирус оқибатидаги ўлимлар бўйича ҳақиқий ҳолатни «Росстат» маълумотларидан билиб олиш мумкинлиги, лекин у ерда маълумотлар жуда кечикиб берилиши ва «Стопкоронавирус.рф» сайтида кўрсатилган ўлимлар сони билан тўғри келмаслиги, улар мамлакат бўйича ўртача 4—5 марта кўпроқлиги маълум қилинганди. Кейинроқ бош вазир ўринбосари Татяна Голикова ҳолатга изоҳ бериб, «Росстат»нинг коронавирус билан боғлиқ ўлим статистикалари ишончли эканлигини айтган. Унинг сўзларига кўра, штабнинг кунлик статистик маълумотларига фақат илгари ПЗР тести натижаси ижобий чиққан одамларнинг ўлими киритилади. «Росстат» статистикасига коронавирус ўлимнинг асосий ёки қўшимча сабаби сифатида аниқланган барча ҳолатлар киритилади.
Изоҳ (0)