Pandemiya boshidan buyon AQShda 292 001 kishi COVID-19 oqibatida vafot etdi, deb xabar beradi “RBK” Jons Hopkins universiteti ma’lumotlariga tayanib. Bu mamlakatning Ikkinchi jahon urushi yillaridagi harbiy talafotlaridan ham ko‘proq.
AQSh veteranlar masalalari bo‘yicha vazirligi ma’lumotlariga ko‘ra, urush yillarida 291 557 kishi urushda, yana 113 842 kishi urushdan tashqarida halok bo‘lgan.
AQShda koronavirusga chalinish bo‘yicha jami 15,6 millionta holat qayd etilgan.
AQSh kasalliklar nazorati va profilaktikasi markazi (CDC) direktori Robert Redfild yaqin ikki-uch oyda kasallanganlar soni o‘sishi mumkinligi haqida ogohlantirdi. Avvalroq AQShda bir kecha-kunduzda koronavirusdan vafot etganlar soni bo‘yicha navbatdagi antirekord o‘rnatilgan edi (3054 ta o‘lim). Taqqoslash uchun: 11-sentabr teraktlarida qariyb 2,9 ming kishi, Pyorl-Xarborga hujum chog‘ida esa taxminan 2,4 ming kishi halok bo‘lgan.
Izoh (0)