Jizzax shahrida N.I.Pirogov nomidagi Rossiya milliy ilmiy tekshirish tibbiyot universiteti federal davlat avtonom oliy ta’lim muassasasi filiali va N.I.Pirogov nomidagi Rossiya milliy ilmiy-tekshirish tibbiyot universiteti federal davlat avtonom oliy ta’lim muassasasi filiali klinikasi tashkil etiladi.
Bu bo‘yicha Vazirlar Mahkamasining “N.I.Pirogov nomidagi Rossiya milliy ilmiy-tekshirish tibbiyot universiteti federal davlat avtonom oliy ta’lim muassasasi filialini tashkil etish chora-tadbirlari to‘g‘risida”gi qarori loyihasi e’lon qilindi.
Filial va filial klinikasi faoliyatining asosiy yo‘nalishlari quyidagilardan iborat:
- respublikaning sog‘liqni saqlash sohasi tarmoqlaridagi muhim tibbiy-kasbiy va tibbiy-texnologik vazifalarni hal etishga qodir bo‘lgan yuqori malakali tibbiyot kadrlarni tizimli-uzluksiz xalqaro ta’lim standartlariga muvofiq tayyorlash, qayta tayyorlash va malakasini oshirish;
- davolash ishi, pediatriya ishi, stomatologiya, farmatsiya va tibbiyotning boshqa sohalarida fundamental va amaliy ilmiy tadqiqotlar olib borish;
- sog‘liqni saqlash sohasida tibbiyot kadrlari tayyorlash tizimini takomillashtirish va modernizatsiya qilishga yo‘naltirilgan yangi ta’lim dasturlari hamda o‘qitish shakllarini ishlab chiqish va tatbiq etish;
- tibbiy ta’lim, ilm-fan va ishlab chiqarishning yaqin integratsiyalashuvi uchun shart-sharoitlar yaratish;
- ilmiy-pedagogik salohiyatning rivojlanishini qo‘llab-quvvatlash, pedagogik texnologiyalar va o‘qitish usullarini faol takomillashtirish;
- klinikada, klinik, o‘quv va o‘quv-amaliyot bazalarida talabalar amaliy ko‘nikmalarini samarali o‘zlashtirish uchun shart-sharoitlar yaratish;
- tibbiy ta’lim hamda ilmiy-texnikaviy sohalarda xorijiy mamlakatlarning yetakchi ta’lim muassasalari, ilmiy-tadqiqot markazlari va biznes hamjamiyati bilan uzoq muddatli munosabatlarni rivojlantirish va mustahkamlash.
- filial direktori va filial klinikasi bosh shifokori O‘zbekiston Respublikasi Sog‘liqni saqlash vazirligi tomonidan bosh muassasa bilan kelishilgan holda lavozimga tayinlanadi va lavozimidan ozod etiladi.
Filialda o‘qitish rus tilida, Rossiya Federatsiyasining federal ta’lim standartlariga muvofiq O‘zbekiston Respublikasi Sog‘liqni saqlash vazirligi bilan kelishilgan holda bosh muassasa tomonidan tasdiqlangan o‘quv rejalari va dasturlarga muvofiq to‘lov-kontrakt asosida amalga oshiriladi.
Filialning ta’lim faoliyati 2022/2023-o‘quv yilidan boshlanib, bitiruvchilariga O‘zbekiston Respublikasida oliy ma’lumot to‘g‘risidagi hujjat sifatida tan olinadigan universitet diplomi beriladi.
Izoh (0)