Andijon viloyati Bo‘ston tumani hududidan o‘tuvchi A 373 avtomobil yo‘lining Andijon—Toshkent yo‘nalishida yo‘l chetida to‘xtab turgan ikkita Lacetti’da qiymati, taxminan, 11,5 million so‘m bo‘lgan pirotexnika vositalari borligi aniqlangan. Bu haqda “Daryo”ga Andijon viloyat IIB axborot xizmati xabar berdi.
Ma’lum qilinishicha, 2020-yil 2-dekabr kuni soat 03:30 da Bo‘ston tuman ichki ishlar bo‘limi HPB profilaktika inspektorlari K.Otaxonov, N.Rahmonov, O.Abdulazizov hamda tuman IIB yo‘l harakati xavfsizlik guruhi katta inspektori B.Azimjonov hamkorligida o‘tkazilgan reyd tadbirida tuman hududidan o‘tuvchi A 373 avtomobil yo‘lida to‘xtab turgan 21 yoshli fuqaro B.S. hamda 35 yoshli fuqaro J.S.ga tegishli Lacetti’lar xolislar ishtirokida ko‘zdan kechirilganda avtomobillarda pirotexnika borligi aniqlangan.
Aniqlanishicha, avtomobillarning saloni va yukxonasida Baliqchi tumanida yashovchi 23 yoshli fuqaro S.A.ga tegishli bo‘lgan, xorijda ishlab chiqarilgan “7Shots” nomli 67 dona, “Zolotoy pesok” nomli 264 dona, “Korsar” nomli 750 quti (har bir qutida 60 donadan), “9D” nomli 11 dona — umumiy narxi 1100 dollar bo‘lgan pirotexnika vositalari topilgan.
Samarqand viloyat IIB YHXB axborot xizmatining “Daryo”ga ma’lumot berishicha, viloyatning Nurobod tumanida ham 28 800 dona pirotexnika vositasini noqonuniy olib ketayotgan haydovchi aniqlangan.
2020-yilning 10-dekabr kuni Nurobod tumani “Mehnatkash” mahallasi hududidan o‘tuvchi avtomobil yo‘lida tashkil qilingan nazorat to‘siq postida Toshkent—Termiz yo‘nalishida harakatlanib kelayotgan Surxondaryo viloyati Jarqo‘rg‘on tumanida yashovchi 30 yoshli N.O‘. boshqaruvidagi Cobalt’dan 48 blok 480 quti 28 800 dona “Treniya” pirotexnika vositalari borligi ma’lum bo‘lgan va tegishli tartibda hujjatlashtirib olingan.
Mazkur holatlar yuzasidan tergovga qadar tekshiruv harakatlari olib borilmoqda.
Izoh (0)