Samarqand viloyatida so‘nggi ikki yilda 26 milliard so‘m budjet mablag‘larini talon-toroj qilish holatlari aniqlangan. Bu qilmishlar uchun 246 nafar shaxs jinoiy javobgarlikka tortilgan hamda 2 249 nafar shaxsga nisbatan ma’muriy ish qo‘zg‘atilgan. Bu haqda “Daryo”ga viloyat prokurori Ravshan Masharipov ma’lum qildi.
Ta’kidlanishicha, budjetdan tashqari Pensiya jamg‘armasining Toyloq tuman bo‘limi mansabdor shaxslari noqonuniy ravishda 10 ta holatda 111 million so‘mlik pensiya mablag‘larini plastik kartaga o‘tkazib, o‘zlashtirish yo‘li bilan talon-toroj qilgan.
Shuningdek, viloyat Milliy bankida ishlagan A.B. bank omonatchilarining hisob raqamidan jami 90 ta holatda 7,7 milliard so‘m, 607 ming dollar va 1461 yevro omonat mablag‘larini o‘zlashtirish yo‘li bilan talon-toroj qilgan.
“Agrobank”ning Chelak filiali xodimi A.A. kredit ajratishni so‘rab bankka murojaat qilmagan fuqarolar nomiga 30 million so‘m mikroqarz krediti ajratib, pulni plastik kartochkasiga tushirib, o‘zlashtirib yuborgan.
“Ipoteka bank”ning Ko‘ksaroy filiali “Juma” mini-banki mudiri Ch.Ch. bankning boshqa mansabdor shaxslari bilan jinoiy til biriktirib, davlat dasturi asosida baliqchilik va aholi tadbirkorligi uchun ajratilgan 6 milliard 995 million so‘mlik kredit mablag‘larini talon-toroj qilgan.
Izoh (0)