Osiyo taraqqiyot banki (OTB) Osiyoning rivojlanayotgan davlatlari iqtisodiy o‘sishi bo‘yicha prognozlarini bu yil -0,7 foizdan -0,4 foizgacha yaxshiladi. “Gazeta.uz”ning xabar berishicha, bu boradagi ma’lumotlar bankning yangi hisobotida keltirilgan (PDF).
Mutaxassislar 2021-yilda 6,8 foiz o‘sish kuzatilishini prognoz qilishda davom etayotgan bo‘lsa-da, mintaqa ichida rivojlanish istiqbollari turlicha bo‘lishini, ya’ni Sharqiy Osiyoda iqtisodiyot o‘sishi va boshqa submintaqalarda esa pasayish kuzatilishi kutilayotganini ta’kidlamoqda.
Markaziy Osiyo YaIMining prognozi 2020-yilda 2,1 foiz darajasida saqlanib qolingan, ammo 2021-yil prognozi nisbatan biroz — 3,9 foizdan 3,8 foizgacha pasaygan. Mintaqa mamlakatlaridagi inflyatsiya darajasi, ekspertlar kutganidek, 2020-yilda 8,3 foizdan 7,8 foizgacha va 2021-yilda 6,6 foizdan 6,5 foizgacha kamayadi.
“Osiyodagi rivojlanayotgan mamlakatlarning istiqbollari yaxshilanmoqda. Xususan, mintaqaning ikki yirik iqtisodiyoti bo‘lgan XXR va Hindiston uchun o‘sish prognozlari ko‘tarildi. Uzoq muddatga cho‘zilayotgan pandemiya hamon asosiy xavf bo‘lib qolmoqda, ammo vaksinalar bo‘yicha kuzatilayotgan so‘nggi o‘zgarishlar uning ta’sirini yumshatishi kutilmoqda. Rivojlanayotgan mamlakatlarga vaksinalarni xavfsiz, samarali va o‘z vaqtida yetkazib berish mintaqadagi iqtisodiy tiklanish va o‘sishni qo‘llab-quvvatlash uchun juda muhimdir”, — deb ta’kidlagan bankning bosh iqtisodchisi Yasuyuki Savada.
Avvalroq Osiyo taraqqiyot banki 2020-yilda O‘zbekistonda iqtisodiy o‘sish 0,5 foizgacha pasayishini prognoz qilgani xabar berilgan edi.
Izoh (0)