Farg‘onada 2 tup chinor va bir tup tolni noqonuniy kestirgan bog‘cha mudirasiga 15 mln so‘m jarima yozildi

Farg‘onada ikki tup chinor va bir tup tol daraxtini kestirgan bog‘cha mudirasiga 15 million so‘m jarima yozildi, deya xabar bermoqda “Daryo” muxbiri.

Ma’lum bo‘lishicha, Uchko‘prik tumanidagi 11-sonli maktabgacha ta’lim tashkiloti hududida ikki tup chinor va bir tup tol daraxti noqonuniy ravishda kesilgan. Diametri 50 va 90 santimetr bo‘lgan ikki tup chinor daraxti 15-20 yillik bo‘lgan.

Uchko‘prik tuman Ekologiya va atrof-muhitni muhofaza qilish bo‘limi inspeksiyasi davlat inspektorlari tomonidan o‘tkazilgan tezkor reyd tadbirlarida mazkur ishni bog‘cha mudirasi M.A. sodir etgani ma’lum bo‘lgan.

Holat yuzasidan 11-sonli MTT mudirasiga nisbatan Ma’muriy javobgarlik to‘g‘risidagi kodeksning 79-moddasi 1-qismi (Daraxtlar, butalarni, boshqa o‘rmon o‘simliklari va nihollarni g‘ayriqonuniy ravishda kesish, shikastlantirish yoki yo‘q qilish)ga asosan 2 million 230 ming so‘m ma’muriy hamda 13 million 45 ming 500 so‘m miqdorida o‘simlik dunyosiga yetkazilgan zarar sifatida jarima hisoblangan. Ma’muriy bayonnoma rasmiylashtirilib, sudga taqdim qilingan. Bog‘cha mudirasining aybi isbotlansa, u 15 million 275 ming 500 so‘m jarima to‘laydi.