“Real” va “Barselona”ning Chempionlar Ligasi 1/8 finalidagi ehtimoliy raqiblari ma’lum bo‘ldi

Yevropa Chempionlar Ligasining guruh bosqich o‘yinlari ortda qoldi va 1/8 finalga yo‘l olgan barcha jamoa nomi ma’lum bo‘ldi.

“Real” va “Barselona” matbuot xizmatlari 1/8 finaldagi ehtimoliy raqiblar haqida ma’lum berdi.

“Real”ga keyingi bosqichda o‘z guruhida ikkinchi o‘rinni egallagan to‘rtta raqibdan biri duch keladi. Bular: “Atalanta”, “Latsio”, “Leypsig”, “Portu”.

“Real” 1/8 finalda Ispaniyadan bo‘lgani uchun “Sevilya”, “Barselona” va “Atletiko”ga qarshi o‘ynamaydi, yana bir ikkinchi savatchadagi jamoa — “Borussiya M” esa madridliklar bilan bir guruhdan joy olgandi.

“Barselona”ga esa juda qiyin raqib duch kelishi mumkin. Katalonlar so‘nggi turda “Yuventus”ga imkoniyatni boy berdi va ikkinchi o‘rin bilan keyingi bosqichga chiqdi.

“Barselona” quyidagi jamoalardan biri bilan to‘qnash keladi: “Manchester Siti”, “Liverpul”, “Chelsi”, “Borussiya D”, “Bavariya” va PSJ.

Nimchorak finalga 14-dekabr, dushanba kuni qur’a tashlanadi.