O‘zbekiston Milliy olimpiya qo‘mitasi (MOQ) ijroiya qo‘mitasining navbatdan tashqari yig‘ilishi 9-dekabr, dushanba kuni bo‘lib o‘tdi, deb xabar bermoqda Jismoniy tarbiya va sport vazirligi axborot xizmati.
Unda 16-dekabr kuni Ummonning Maskat shahrida bo‘lib o‘tadigan Osiyo Olimpiya kengashining (OOK) navbatdagi bosh assambleyasiga tayyorgarlik ko‘rish, ushbu tadbirda bo‘lib o‘tadigan OOK rahbariyati tarkibiga, xususan, tashkilot vitse-prezidentligiga O‘zbekiston tomonidan taklif etiladigan nomzodni ko‘rib chiqish masalasi ko‘rib chiqildi.
Maskatda bo‘lib o‘tadigan bosh assambleyada 2030-yil bo‘lib o‘tadigan yozgi Osiyo o‘yinlariga mezbon davlat aniqlanadi. Shuningdek, xalqaro tashkilotga vitse-prezidentlar saylanib, 2025-yil bo‘lib o‘tadigan IV yoshlar Osiyo o‘yinlarining mezbon mamlakati, ya’ni O‘zbekiston tomoni bilan shartnoma imzolanadi.
Ijroqo‘m yig‘ilishida Otabek Umarov nomzodi OOK vitse-prezidentligiga ilgari surildi.
Osiyo Olimpiya kengashida jami 10 nafar vitse-prezident faoliyat ko‘rsatadi. Ularning 5 nafari qit’adagi mintaqalar bo‘yicha ish olib borsa, qolgan yarmi Osiyo qit’asida o‘tadigan beshta yirik kompleks musobaqalar, ya’ni yozgi Osiyo o‘yinlari, qishki Osiyo o‘yinlari, Jang san’ati va yopiq inshootlardagi Osiyo o‘yinlari, sohil Osiyo o‘yinlari hamda yoshlar Osiyo o‘yinlarini yuqori saviyada tashkil etishga mas’ul hisoblanadi. 16-dekabr kuni Maskatda bo‘lib o‘tadigan assambleyada 2021-yildan boshlab o‘tkaziladigan kompleks musobaqalarga mezbonlik qiluvchi mamlakatlar OOK vitse-prezidentligi uchun o‘z nomzodini ilgari surish imkoniyatiga ega. Shu tariqa O‘zbekiston ilk bor 2025-yil yoshlar Osiyo o‘yinlarini qabul qilishi evaziga ushbu nufuzli tashkilot rahbariyatiga o‘z vakilini nomzod qilib ko‘rsatish huquqini qo‘lga kiritdi.
Shuningdek, Ijroqo‘m yig‘ilishida Toshkent—2025 yoshlar Osiyo o‘yinlari direksiyasining direktori ham saylandi. Ushbu lavozimga MOQ bosh kotibi Oybek Qosimov nomzodi bir ovozdan ma’qullandi.
Eslatib o‘tamiz, MOQ sobiq prezidenti Umid Ahmadjonov 2019-yilning mart oyida 2019—2022-yillardagi musobaqalar uchun OOK vitse-prezidenti etib saylangandi.
Ma’lumot uchun, Otabek Umarov O‘zbekiston Prezidenti Shavkat Mirziyoyevning kenja kuyovi hisoblanadi. U 2019-yilning 7-martida O‘zbekiston Triatlon federatsiyasiga rais bo‘lgandi. 2019-yil 8-noyabrida esa yangi tashkil etilgan O‘zbekiston MMA assotsiatsiyasi prezidentiga aylangandi. Shuningdek, 2020-yil 9-fevralida uning yangi tuzilgan O‘rta Osiyo MMA konfederatsiyasi rahbariga aylangani haqida xabar berilgandi. Umarov 2020-yilning avgust oyida Triatlon federatsiyasi raisligi va MMA assotsiatsiyasi prezidentligidan ketgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)