Estoniya hukumati koronavirus tarqalishining oldini olish uchun kelasi haftadan boshlab mamlakat bo‘ylab ta’lim va sport sohalarida qo‘shimcha cheklovlar kiritadi, deb xabar bermoqda “Interfaks”.
Xabarga ko‘ra, 14-dekabrdan boshlab barcha ta’lim muassasalari: umumta'lim maktablari, kasb-hunar va amaliy maktablar, shuningdek, universitetlarni yopish rejalashtirilgan.
Birinchi sinfdan boshlab barcha o‘quvchilar masofaviy o‘qishga o‘tadi. Agar hukumat boshqa qarorga kelmasa, keyingi 2021-yil 11 yanvaridan boshlab ish odatiy tartibda davom etadi. Bog‘chalar va bolalar yaslisi ochiqligicha qoladi.
Shuningdek, 14-dekabrdan boshlab havaskorlik to‘garaklari faoliyati hamda yoshlar va kattalar uchun sport mashg‘ulotlari uch haftaga to‘xtatiladi. Individual mashg‘ulotlar bundan mustasno. Cheklovlar professional sportchilarga, shu jumladan, master-ligasida ishtirok etadigan jamoalarga, terma jamoalarga va terma jamoaga nomzodlarga taalluqli emas.
O‘zini yakkalash rejimiga rioya etilishi ustidan nazorat kuchaytiriladi, ayniqsa, chegarani kesib o‘tganlar uchun. Chegaradan o‘tishni qisqartirish rejalashtirilgan.
Hukumat korxonalarning yopilishi oqibatida eng ko‘p zarar ko‘radigan sohalar uchun pul kompensatsiyasi berishning qo‘shimcha mexanizmlarini ishlab chiqadi.
Xabarda aytilishicha, ushbu cheklovlar to‘g‘risidagi qaror mamlakat hukumatining navbatdagi yig‘ilishida qabul qilinishi kutilmoqda. Bu so‘nggi kunlarda joriy etilayotgan ikkinchi qo‘shimcha cheklovlar. Avvalgi cheklovlar 5-dekabrdan boshlab kuchga kirgandi.
O‘shanda mamlakatdagi do‘kon va servis xo‘jaliklarining savdo hamda xizmat ko‘rsatish xonalarida bir vaqtning o‘zida ushbu joylar umumiy sig‘imining 50 foizidan ko‘p odam bo‘lishi taqiqlangandi. Shu bilan birga, odamlar “2 + 2” qoidasiga rioya qilishi kerak. Bunda odamlar maksimal ikkitadan bo‘lib, o‘zaro ikki metr masofa saqlab yurishlari lozim.
Shuningdek, soat 22:00 dan 06:00 gacha umumiy ovqatlanish, ko‘ngilochar va tomoshabinlar uchun statsionar o‘rindiqlar bo‘lmagan ommaviy tadbirlarni o‘tkazish joylari tashrif buyuruvchilar uchun yopiq bo‘lishi kerak. Umumiy ovqatlanish joylari xaridorlarga oziq-ovqat mahsulotlarini sotish yoki oziq-ovqat yetkazib berish uchun kuryerlik va transport xizmatlarini ko‘rsatishga ruxsat beriladi.
Bundan tashqari, yuqoridagi joylarda shaxsiy tadbirlar o‘tkazilishiga yo‘l qo‘yilmaydi. Ijtimoiy va sport tadbirlariga ham xuddi shunday talablar qo‘yiladi.
Avvalroq Shveysariyada niqob taqmaganlar 230 yevro jarimaga tortilishi belgilangani, Germaniyada koronavirus bilan bog‘liq cheklovlar 10-yanvargacha uzaytirilishi rejalashtirilayotgani, Latviyada COVID-19 tufayli joriy qilingan favqulodda holat rejimi 11-yanvargacha uzaytirilgani hamda Moskvada koronavirus tufayli cheklov choralari 15-yanvargacha uzaytirilgani haqida xabar berilgandi.
Izoh (0)