Tesla va SpaceX asoschisi Ilon Mask 8-dekabr kuni Starship kosmik kemasini yaratish va yangi Tesla elektromobillar zavodini qurishga e’tibor berish uchun Kaliforniyadan Texasga ko‘chib o‘tganligini ma’lum qildi. U bu haqda The Wall Street Journal bosh muharriri Mett Myurrey bilan videosuhbatida aytib o‘tdi.
Suhbat vaqtida Mask Amerikaning boshqa kompaniyalari rahbarlarini o‘z mahsulotlariga yetarlicha e’tibor bermasliklari uchun tanqid qildi va o‘zini oldingi chiziqda harakat qiluvchi general bilan tenglashtirdi.
“Agar siz urush qilmoqchi bo‘lsangiz, generalni qandaydir fil suyagidan qilingan minorada ko‘rishni xohlaysizmi yoki oldingi chiziqdami? Qo‘shin generalning oldingi chiziqda ekanini ko‘rsa, qattiqroq jang qiladi”, – deydi Ilon Mask.
Suhbat davomida tadbirkor Kremniy vodiysi dunyoga juda katta ta’sir ko‘rsatayotganini aytdi, ammo bir muncha vaqt o‘tgach, uning fikriga ko‘ra, bu ta’sir vaqt o‘tib kamayadi.
Ma’lumot uchun 4-dekabr kuni CNBC Ilon Mask Texasga ko‘chib o‘tishga qaror qilgani haqida xabar berdi, ammo yaqin vaqtgacha tadbirkor buni tasdiqlamadi.
The Wall Street Journal va Reuters Mask soliqlar tufayli Kaliforniyadan Texasga ko‘chib o‘tgan bo‘lishi mumkin, deb taxmin qildi. Kaliforniya Qo‘shma Shtatlardagi shaxsiy daromad solig‘i bo‘yicha eng yuqori ko‘rsatkichlardan biriga ega shtat hisoblanadi. Texasda esa daromad solig‘i olinmaydi.
Mavzuga doir:
Izoh (0)