Эстония ҳукумати коронавирус тарқалишининг олдини олиш учун келаси ҳафтадан бошлаб мамлакат бўйлаб таълим ва спорт соҳаларида қўшимча чекловлар киритади, деб хабар бермоқда «Интерфакс».
Хабарга кўра, 14 декабрдан бошлаб барча таълим муассасалари: умумтаълим мактаблари, касб-ҳунар ва амалий мактаблар, шунингдек, университетларни ёпиш режалаштирилган.
Биринчи синфдан бошлаб барча ўқувчилар масофавий ўқишга ўтади. Агар ҳукумат бошқа қарорга келмаса, кейинги 2021 йил 11 январидан бошлаб иш одатий тартибда давом этади. Боғчалар ва болалар яслиси очиқлигича қолади.
Шунингдек, 14 декабрдан бошлаб ҳаваскорлик тўгараклари фаолияти ҳамда ёшлар ва катталар учун спорт машғулотлари уч ҳафтага тўхтатилади. Индивидуал машғулотлар бундан мустасно. Чекловлар профессионал спортчиларга, шу жумладан, мастер-лигасида иштирок этадиган жамоаларга, терма жамоаларга ва терма жамоага номзодларга тааллуқли эмас.
Ўзини яккалаш режимига риоя этилиши устидан назорат кучайтирилади, айниқса, чегарани кесиб ўтганлар учун. Чегарадан ўтишни қисқартириш режалаштирилган.
Ҳукумат корхоналарнинг ёпилиши оқибатида энг кўп зарар кўрадиган соҳалар учун пул компенсацияси беришнинг қўшимча механизмларини ишлаб чиқади.
Хабарда айтилишича, ушбу чекловлар тўғрисидаги қарор мамлакат ҳукуматининг навбатдаги йиғилишида қабул қилиниши кутилмоқда. Бу сўнгги кунларда жорий этилаётган иккинчи қўшимча чекловлар. Аввалги чекловлар 5 декабрдан бошлаб кучга кирганди.
Ўшанда мамлакатдаги дўкон ва сервис хўжаликларининг савдо ҳамда хизмат кўрсатиш хоналарида бир вақтнинг ўзида ушбу жойлар умумий сиғимининг 50 фоизидан кўп одам бўлиши тақиқланганди. Шу билан бирга, одамлар «2 + 2» қоидасига риоя қилиши керак. Бунда одамлар максимал иккитадан бўлиб, ўзаро икки метр масофа сақлаб юришлари лозим.
Шунингдек, соат 22:00 дан 06:00 гача умумий овқатланиш, кўнгилочар ва томошабинлар учун стационар ўриндиқлар бўлмаган оммавий тадбирларни ўтказиш жойлари ташриф буюрувчилар учун ёпиқ бўлиши керак. Умумий овқатланиш жойлари харидорларга озиқ-овқат маҳсулотларини сотиш ёки озиқ-овқат етказиб бериш учун курьерлик ва транспорт хизматларини кўрсатишга рухсат берилади.
Бундан ташқари, юқоридаги жойларда шахсий тадбирлар ўтказилишига йўл қўйилмайди. Ижтимоий ва спорт тадбирларига ҳам худди шундай талаблар қўйилади.
Аввалроқ Швейцарияда ниқоб тақмаганлар 230 евро жаримага тортилиши белгилангани, Германияда коронавирус билан боғлиқ чекловлар 10 январгача узайтирилиши режалаштирилаётгани, Латвияда COVID-19 туфайли жорий қилинган фавқулодда ҳолат режими 11 январгача узайтирилгани ҳамда Москвада коронавирус туфайли чеклов чоралари 15 январгача узайтирилгани ҳақида хабар берилганди.
Изоҳ (0)