Belarus Vazirlar kengashi mamlakat hududidan quruqlikdagi o‘tkazish punktlari orqali mamlakatdan chiqishni vaqtincha taqiqlashga qaror qildi. Meduza’ning xabar berishicha, bu haqda asosiy qoidalari 20-dekabrdan kuchga kiradigan mamlakat hukumati qarorida qayd etilgan.
Qarorda aytilishicha, Belarus fuqarolari va ushbu mamlakatda yashash uchun vaqtinchalik guvohnoma olgan chet el fuqarolariga avtomobil yo‘llari o‘tkazish punktlari, soddalashtirilgan o‘tkazish punktlari, temiryo‘l vokzallari va stansiyalardagi o‘tkazish punktlari, shuningdek, daryo portlari orqali chiqish taqiqlanadi.
Taqiq diplomatik va xizmat pasport egalari, xizmat safari va boshqa ayrim toifalardagi shaxslarga tegishli emas. Boshqa mamlakatda yashash uchun ruxsatnoma olgan Belarus fuqarolari yarim yilda bir marta Belarusdan doimiy yashash joyiga chiqishi mumkin. Shuningdek, fuqarolar og‘ir kasal yoki boshqa bir mamlakatda yaqin qarindoshi vafot etgan taqdirda, shuningdek, davolanish, ishlash yoki o‘qish uchun mamlakatni tark etishi mumkin bo‘ladi.
Yangi qarorga ko‘ra, COVID-19 tarqalgan davlat Belarusga kirib kelayotgan mamlakat fuqarolari va chet el fuqarolari 10 kun davomida karantinda bo‘lishlari kerak. Mamlakatga kelayotgan 6 yoshdan oshgan barcha fuqarolarda kelishdan 3 kun avval qilingan koronavirusga PZR-testi natijasi salbiy chiqqanini ko‘rsatuvchi ma’lumotnoma bo‘lishi kerak. Ushbu talab Belarusda yashash huquqiga ega bo‘lgan fuqarolar, shuningdek, tranzit orqali keluvchi chet elliklarga nisbatan tatbiq etilmaydi.
Avvalroq Rossiyaning Gamaleya nomidagi markaz rahbari Aleksandr Ginsburg koronavirus tarqalishiga qarshi kurashda chegaralarni yopish kabi choralar o‘z kuchini yo‘qotgani, chunki pandemiya rivojlanishida asosiy rolni odamlar atrofidagi kasallik manbalari o‘ynashini aytgandi. “Anchadan beri kasallik tarqalishida asosiy rolni infeksiyaning chetdan kirishi emas, balki atrofimizdagi infeksiya manbalari o‘ynamoqda. Shuning uchun epidemiologik jarayonni boshqarish qiyin bo‘lib ketdi va u ommaviy tus oldi”, — deya tushuntirgan u.
Virus tarqalishini real vaqt rejimida kuzatib kelayotgan Jons Hopkins universiteti ma’lumotlariga ko‘ra, ayni paytda dunyoda koronavirusga chalinganlar soni 69 milliondan oshdi. Shu sababli dunyoning ko‘plab mamlakatlarida virusga qarshi kurashish yo‘lida cheklov choralari kuchaytirilmoqda.
Xususan, Ukrainada 2021-yil 8-yanvardan qat’iy karantin joriy etiladi, Moskvada koronavirus tufayli cheklov choralari 15-yanvargacha, Latviyada COVID-19 tufayli joriy qilingan favqulodda holat rejimi 11-yanvargacha uzaytirildi. Germaniyada koronavirus bilan bog‘liq cheklovlar 10-yanvargacha uzaytirilishi rejalashtirilmoqda, Shveysariyada niqob taqmaganlar 230 yevro jarimaga tortilishi belgilandi, Estoniyada 14-dekabrdan boshlab barcha ta’lim muassasalari vaqtinchalik yopiladi.
Izoh (0)