Turkiya sog‘liqni saqlash vaziri Faxrettin Ko‘ja Anqara Rossiyaning COVID-19’ga qarshi “Sputnik V” vaksinasini sotib olishdan bosh tortgani yuzasidan raddiya berdi, deb yozadi “RBK”.
Ko‘janing so‘zlariga ko‘ra, ayni paytda turkiyalik mutaxassislar dori ustida toksikologik tadqiqotlarni olib bormoqda. “Rossiyada ishlab chiqarilgan vaksina toksikologik sinovlardan o‘tib, GLP (tegishli laboratoriya amaliyoti)ga muvofiq kelishi biz uchun muhim. Biz bu sinovlarni boshlayapmiz. Aytishim mumkinki, agar ular muvaffaqiyatli kechsa, Rossiyada ishlab chiqarilgan vaksinani yetkazish bilan bog‘liq muammolar yuzaga kelmaydi”, — deya aniqlik kiritdi vazir.
Shu tariqa Ko‘ja avvalroq Haber Turk gazetasi e’lon qilgan ma’lumotni rad etdi. Nashr sog‘liqni saqlash vaziriga tayanib, “Sputnik V” GLP’ga muvofiq kelmasligini, Turkiyada litsenziyani ololmasligi va shu sababli “qiziqish doirasidan chiqqani” haqida xabar bergandi.
Keyinroq vaksinani ishlab chiqishda ishtirok etgan Rossiya to‘g‘ridan to‘g‘ri investitsiyalar jamg‘armasi (RTIJ) matbuot xizmati ham Anqaraning ushbu vaksinani sotib olishdan bosh tortgani haqidagi xabarlarni soxta deb atab, bu chet elda turib vaksinaga qarshi olib borilayotgan axborot kampaniyasiga misol bo‘la olishini aytdi.
“Koronavirus infeksiyasiga qarshi dunyodagi birinchi ro‘yxatdan o‘tgan vaksina ‘Sputnik V’ raqobatchilik yoki siyosiy sabablarga ko‘ra, Rossiyada va chet elda salbiy axborot hujumi nishoni ostida qoldi. Go‘yoki Turkiya hukumati ‘Sputnik V’ vaksinasini sotib olishdan bosh tortgani haqidagi haqiqatga to‘g‘ri kelmagan bugungi holat Rossiya vaksinasi haqida ishonchsiz ma’lumotlar tarqatilayotganiga yana bir misol bo‘ldi”, — deyiladi xabarda.
RTIJda qayd etishlaricha, OAVda ba’zan dorining tavsifi, uning ishlab chiqarilishi yoki potensial sheriklar yo xaridorlar bilan muzokaralar borasida ishonchsiz maqolalar paydo bo‘lmoqda.
“RBK”ning RTIJdagi manbasi ma’lum qilishicha, Anqara bilan vaksina yetkazib berish borasidagi muzokaralar hali davom etmoqda.
Rossiya prezidentining matbuot kotibi Dmitriy Peskovning so‘zlariga ko‘ra, klinik sinovlar vaksinaning ishonchliligi va samaradorligini tasdiqlagan. Peskov “Sputnik V” “pandemiyaga qarshi kurashda hali juda muhim rol” o‘ynashiga ishonch bildirdi.
Ayni vaqtda vaksinani ishlab chiqqan Gamaleya nomidagi ilmiy markaz rahbari Aleksandr Ginsburg markaz oldiga uskunalarni Yevroittifoq yoki Turkiya standartlari bo‘yicha sertifikatlash vazifasi hech qachon qo‘yilmaganini aytdi.
“Bizning laboratoriya Yevropa sertifikatsiya organlari emas, Rossiya sanoat va savdo vazirligi standartlari bo‘yicha sertifikatlangan. Bizda Yevropa sertifikati emas, xuddi butun sanoatimizda bo‘lgani kabi Rossiya sertifikati bor”, — dedi Ginsburg.
Shu bilan birga, u “Sputnik V” barcha zarur standartlarga muvofiq kelishini va hozirda Jahon sog‘liqni saqlash tashkilotida sertifikatlash jarayonidan o‘tayotganligini ta’kidladi. “JSST uni boshqa mamlakatlarga, shu jumladan, Turkiyaga ham tavsiya qilishi mumkin. Lekin qarorni mamlakatning o‘zi beradi”, — deya qo‘shib qo‘ydi ilmiy markaz rahbari.
Avvalroq Turkiya Rossiyaning koronavirusga qarshi vaksinasini sotib olishdan bosh tortgani haqida Turkiya sog‘liqni saqlash vaziri Faxrettin Ko‘ja ma’lum qilgani xabar berilgan edi. Bunga esa vaksina ishonchli laboratoriya amaliyoti prinsiplariga mos kelmasligi sabab qilib keltirilgan.
Turkiyada koronavirusga qarshi emlash 11-dekabrdan boshlanadi. Buning uchun Xitoy vaksinasidan foydalaniladi. Biroq Turkiya prezidenti Rajab Toyyib Erdo‘g‘on mamlakat vaksina sotib olish bo‘yicha nafaqat Xitoy, balki Rossiya bilan ham muzokara olib borayotgani haqida gapirgan.
Rossiya Sog‘liqni saqlash vazirligi noyabr oyida Turkiya “Sputnik V” vaksinasini ishlab chiqarishni tashkil qilishga qiziqish bildirganini ma’lum qilgan. Undan avval esa turkiyalik rasmiylar vaksinaning toksikologik sinovini o‘tkazishni xohlagan.
Eslatib o‘tamiz, Rossiya Sog‘liqni saqlash vazirligining Gamaleya instituti tomonidan ishlab chiqilgan va “Sputnik V” vaksinasi 11-avgustda ro‘yxatdan o‘tkazilgan. Vaksina klinik sinovlari uchinchi bosqichining oraliq tahlil natijalari 92 foiz samaradorlikni tashkil etishini ko‘rsatdi. Dekabr oyi boshlarida vaksina ikkita komponentining maksimal narxi ma’lum qilindi.
Izoh (0)