Беларусь Вазирлар кенгаши мамлакат ҳудудидан қуруқликдаги ўтказиш пунктлари орқали мамлакатдан чиқишни вақтинча тақиқлашга қарор қилди. Meduza’нинг хабар беришича, бу ҳақда асосий қоидалари 20 декабрдан кучга кирадиган мамлакат ҳукумати қарорида қайд этилган.
Қарорда айтилишича, Беларусь фуқаролари ва ушбу мамлакатда яшаш учун вақтинчалик гувоҳнома олган чет эл фуқароларига автомобиль йўллари ўтказиш пунктлари, соддалаштирилган ўтказиш пунктлари, темир йўл вокзаллари ва станциялардаги ўтказиш пунктлари, шунингдек, дарё портлари орқали чиқиш тақиқланади.
Тақиқ дипломатик ва хизмат паспорт эгалари, хизмат сафари ва бошқа айрим тоифалардаги шахсларга тегишли эмас. Бошқа мамлакатда яшаш учун рухсатнома олган Беларусь фуқаролари ярим йилда бир марта Беларусдан доимий яшаш жойига чиқиши мумкин. Шунингдек, фуқаролар оғир касал ёки бошқа бир мамлакатда яқин қариндоши вафот этган тақдирда, шунингдек, даволаниш, ишлаш ёки ўқиш учун мамлакатни тарк этиши мумкин бўлади.
Янги қарорга кўра, COVID-19 тарқалган давлат Беларусга кириб келаётган мамлакат фуқаролари ва чет эл фуқаролари 10 кун давомида карантинда бўлишлари керак. Мамлакатга келаётган 6 ёшдан ошган барча фуқароларда келишдан 3 кун аввал қилинган коронавирусга ПЗР-тести натижаси салбий чиққанини кўрсатувчи маълумотнома бўлиши керак. Ушбу талаб Беларусда яшаш ҳуқуқига эга бўлган фуқаролар, шунингдек, транзит орқали келувчи чет элликларга нисбатан татбиқ этилмайди.
Аввалроқ Россиянинг Гамалея номидаги марказ раҳбари Александр Гинцбург коронавирус тарқалишига қарши курашда чегараларни ёпиш каби чоралар ўз кучини йўқотгани, чунки пандемия ривожланишида асосий ролни одамлар атрофидаги касаллик манбалари ўйнашини айтганди. «Анчадан бери касаллик тарқалишида асосий ролни инфекциянинг четдан кириши эмас, балки атрофимиздаги инфекция манбалари ўйнамоқда. Шунинг учун эпидемиологик жараённи бошқариш қийин бўлиб кетди ва у оммавий тус олди», — дея тушунтирган у.
Вирус тарқалишини реал вақт режимида кузатиб келаётган Жонс Ҳопкинс университети маълумотларига кўра, айни пайтда дунёда коронавирусга чалинганлар сони 69 миллиондан ошди. Шу сабабли дунёнинг кўплаб мамлакатларида вирусга қарши курашиш йўлида чеклов чоралари кучайтирилмоқда.
Хусусан, Украинада 2021 йил 8 январдан қатъий карантин жорий этилади, Москвада коронавирус туфайли чеклов чоралари 15 январгача, Латвияда COVID-19 туфайли жорий қилинган фавқулодда ҳолат режими 11 январгача узайтирилди. Германияда коронавирус билан боғлиқ чекловлар 10 январгача узайтирилиши режалаштирилмоқда, Швейцарияда ниқоб тақмаганлар 230 евро жаримага тортилиши белгиланди, Эстонияда 14 декабрдан бошлаб барча таълим муассасалари вақтинчалик ёпилади.
Изоҳ (0)