Hokimiyat tepasida respublikachilar bo‘lgan 17 ta shtat vakillari AQSh Oliy sudiga murojaatnoma yuborib, Texas bosh prokurori Ken Pekstonning prezident saylovi natijalarini qayta ko‘rib chiqishni so‘rab bergan da’vosini qo‘llab-quvvatladi. Bu haqda CNBC’ga tayanib, “RBK” xabar bermoqda.
Gap Missuri, Alabama, Arkanzas, Florida, Indiana, Kanzas, Luiziana, Missisipi, Montana, Nebraska, Shimoliy Dakota, Oklaxoma, Janubiy Karolina, Janubiy Dakota, Tennessi, Yuta va G‘arbiy Virjiniya haqida bormoqda.
Telekanalning qayd etishicha, bu murojaat Pekston Jorjiya, Michigan, Pensilvaniya va Viskonsin shtatlarida (ularning barchasida demokrat Jo Bayden g‘olib bo‘lgan) saylov natijalarini haqiqiy emas deb topishni so‘rab Oliy sudga murojaat qilganidan keyin ertasi kuni berilgan. Texas bosh prokurori fikricha, ushbu shtatlarda, shu jumladan, pochta orqali yuborilgan byulletenlarni ko‘rib chiqishga aloqador me’yorlarga rioya qilinmagan.
17 ta shtatdan iborat guruh “sud do‘stlari” murojaatini bergan. Amerika huquq tizimida sud mojarosining to‘g‘ridan to‘g‘ri ishtirokchisi bo‘lmagan manfaatdor shaxslar shunday ataladi. Ular o‘z fikrini bildirish maqsadida sudga yozma murojaat qilish huquqiga ega.
Fox News xabar berishicha, da’vodan maqsad — Jorjiya, Pensilvaniya, Michigan va Viskonsindan saylov hay’ati a’zolarining belgilanishini keyinroqqa surish. Da’voda ta’kidlanishicha, bu shtatlar prezident saylovlarini o‘tkazish qoidalarini o‘zgartirib, konstitutsiyani buzgan. Shuningdek, unda ushbu shtatlar tomonidan qabul qilingan yangi qoidalar de-fakto ovoz berish jarayonida katta ko‘lamli qonun buzilishlari yuzaga kelishiga imkoniyat yaratgan.
AQSh prezidenti Donald Tramp Texas tomonidan berilgan da’voga uni manfaatdor tomon sifatida qo‘shib qo‘yishni talab qildi. Javobgar shtatlarning har birida rasmiy shaxslar 2020-yilgi saylovlarni o‘tkazishda shtat qonunlarini o‘zgartirgan yoki unga rioya qilmagan”, — deyiladi Tramp advokatlarining arizasida.
Davlat rahbari saylov natijalarini qayta ko‘rib chiqish haqidagi da’voga qo‘shilgan shtatlarga minnatdorlik bildirdi. “Qoyil! Saylovlarda AQSh tarixida eng misli ko‘rilmagan firibgarlik haqidagi ishda Texasga kamida 17 ta shtat qo‘shildi. Rahmat!” — deb yozadi u Twitter.
Donald Tramp 3-noyabrda bo‘lib o‘tgan saylovlarda mag‘lub bo‘lganini tan olmay, saylov natijalari qalbakilashtirilganini da’vo qilmoqda. U ba’zi muhim shtatlarda ovoz berish yakunlari qayta ko‘rib chiqilishini talab qilib, buning uchun 9 million dollar ham sarfladi. Ammo byulletenlarning qayta sanab chiqilishi Baydenning g‘alabasini ko‘rsatdi. Sudlar ham amaldagi prezident jamoasining ovoz berish va byulletenlarni hisoblash jarayonidagi qonun buzilishlari haqidagi da’volarini rad etdi.
Dekabr boshida Tramp saylovlar halol bo‘lgan taqdirdagina mag‘lubiyatini tan olishini bildirgandi. “Men saylovda mag‘lub bo‘lishga qarshi emas, lekin u adolatli bo‘lishini xohlayman. Istamaydigan narsam shuki, saylovlar Amerika xalqidan o‘g‘irlab olinmasin”, — dedi Tramp.
Keyinroq AQShning amaldagi prezidenti Donald Tramp 2024-yilda davlat rahbari lavozimiga o‘z nomzodini qo‘yishi mumkinligini bildirdi.
Izoh (0)