AQShda bir kecha-kunduzda koronavirusdan vafot etganlar soni bo‘yicha antirekord o‘rnatildi

AQShda bir kecha-kunduzda COVID-19’dan vafot etganlar soni butun pandemiya davridagi eng yuqori ko‘rsatkichga yetdi, deb yozadi “RBK”.

The New York Times ma’lumotlariga ko‘ra, so‘nggi 24 soat ichida mamlakatda 3011 kishi koronavirus oqibatida vafot etgan. Bundan avvalgi rekord 3-dekabrda qayd etilgan, o‘shanda o‘limlar soni 2879 tani tashkil qilgan edi. Bunga qadar o‘lim darajasi bo‘yicha rekord yarim yildan ortiq vaqt davomida saqlanib turgan va pandemiyaning birinchi to‘lqini chog‘idayoq o‘rnatilgan edi (15-aprelda 2752 ta o‘lim holati).

Nashrning yozishicha, AQSh koronavirus qurbonlarining umumiy soni bo‘yicha ham yana bir katta raqamga yaqin qolgan (ularning soni tez orada 300 ming kishiga yetishi mumkin). Nashr hisob-kitoblariga ko‘ra, hozirda mamlakatda COVID-19 oqibatida kamida 288 ming kishi hayotdan ko‘z yumgan.

Covid Tracking Project portali ma’lumotlariga qaraganda, ayni vaqtda Amerika kasalxonalarida 106 mingdan ziyod koronavirus bemorlari yotibdi. Mamlakat bo‘yicha har kuni o‘rtacha 200 mingdan ortiq odam kasallikka chalinmoqda.

Amerikaning Jons Hopkins universiteti ma’lumotlariga ko‘ra, AQSh COVID-19 bilan kasallanganlar va uning oqibatida vafot etganlar soni bo‘yicha dunyoda birinchi o‘rinni egallamoqda. Butun pandemiya davrida mamlakatda 15,3 million kishi kasallikni yuqtirgan, qariyb 290 ming kishi vafot etgan. Butun dunyoda esa 68,8 million kishida virus aniqlangan, shularning 1,56 millioni vafot etgan.