Hashamatli uy, qimmatbaho mashinalar va shaxsiy samolyot. Pol Pogba millionlarini nimalarga sarflaydi?

Fransiya terma jamoasi va “Manchester Yunayted” yulduzi Pol Pogbaning 2020-yildagi daromadi naq 34 million dollarni tashkil etdi. Xo‘sh, Pol ushbu mablag‘larni soch turmaklaridan tashqari yana nimalarga sarflaydi? Quyida aynan ushbu savolga javob topishga harakat qilib ko‘ramiz.

Pogbaning uyi

Pogba Manchesterdagi hashamatli uyini Xavyer Ernandesdan (Chicharito) 3 million funtga sotib olgan. Pogbaning hashamatli o‘yi o‘zining ulug‘vorligi bilan ajralib turadi.

Imoratda 5 ta yotoqxona, bir nechta mehmonxona, dam olish xonalari, bilyard, suzish havzasi, sauna va ulkan oshxona bor.

Shuningdek, uyda bir qancha qo‘shimcha jihozlar ham mavjud. Ular orasida esa qimmatbaho royal boshqalaridan ajralib turadi.

Pogbaning mashinalari

Pogba juda boy avtoparkiga ega bo‘lib, uning ixtiyoridagi eng qimmat mashina 1 million dollarlik McLaren P1’dir. Ushbu mashina 100 km/soat tezlikka bor-yo‘g‘i 2,8 soniyada yetadi.

Uning yana bir qimmatbaho “toychoq”i Lamborghini Aventador. Fransuz bu uchun naq 500 ming dollardan voz kechgan.

Shuningdek, uning garajida Rolls-Royce, Bentley Continental, Ferrari 812 Superfast kabi mashinalarni ko‘rish mumkin.

Bundan tashqari, Polning o‘z shaxsiy samolyoti ham bor. 23 million dollarlik “temir qush” o‘z bag‘riga 10 kishini sig‘dira oladi, shuningdek, uning ichida ikki kishiga mo‘ljallangan karavot ham mavjud.

Pogbaning sevimli mashg‘ulotlari

Pol Pogba juda xushchaqchaq va ochiq ko‘ngil yigit. U ko‘p vaqtini oilasi va aka-ukalari bilan o‘tkazadi. Biroq shunga qaramay, Pol jamoadoshlariga ham vaqt ajratadi. Zlatan Ibragimovich hamda Romelu Lukaku “Manchester Yunayted”da o‘ynagan kezlari Pogba ular bilan muntazam ravishda stol futboli va basketbol o‘ynab turardi.

Bundan tashqari u raqs va soch turmaklariga alohida e’tibor qaratadi. Aynan ushbu ikki jihat Pogbaning imzosi hisoblanadi.