Ҳашаматли уй, қимматбаҳо машиналар ва шахсий самолёт. Пол Погба миллионларини нималарга сарфлайди?

Франция терма жамоаси ва «Манчестер Юнайтед» юлдузи Пол Погбанинг 2020 йилдаги даромади нақ 34 миллион долларни ташкил этди. Хўш, Пол ушбу маблағларни соч турмакларидан ташқари яна нималарга сарфлайди? Қуйида айнан ушбу саволга жавоб топишга ҳаракат қилиб кўрамиз.

Погбанинг уйи

Погба Манчестердаги ҳашаматли уйини Хавьер Эрнандесдан (Чичарито) 3 миллион фунтга сотиб олган. Погбанинг ҳашаматли ўйи ўзининг улуғворлиги билан ажралиб туради.

Иморатда 5 та ётоқхона, бир нечта меҳмонхона, дам олиш хоналари, бильярд, сузиш ҳавзаси, сауна ва улкан ошхона бор.

Шунингдек, уйда бир қанча қўшимча жиҳозлар ҳам мавжуд. Улар орасида эса қимматбаҳо роял бошқаларидан ажралиб туради.

Погбанинг машиналари

Погба жуда бой автопаркига эга бўлиб, унинг ихтиёридаги энг қиммат машина 1 миллион долларлик McLaren P1’дир. Ушбу машина 100 км/соат тезликка бор-йўғи 2,8 сонияда етади.

Унинг яна бир қимматбаҳо «тойчоқ»и Lamborghini Aventador. Француз бу учун нақ 500 минг доллардан воз кечган.

Шунингдек, унинг гаражида Rolls-Royce, Bentley Continental, Ferrari 812 Superfast каби машиналарни кўриш мумкин.

Бундан ташқари, Полнинг ўз шахсий самолёти ҳам бор. 23 миллион долларлик «темир қуш» ўз бағрига 10 кишини сиғдира олади, шунингдек, унинг ичида икки кишига мўлжалланган каравот ҳам мавжуд.

Погбанинг севимли машғулотлари

Пол Погба жуда хушчақчақ ва очиқ кўнгил йигит. У кўп вақтини оиласи ва ака-укалари билан ўтказади. Бироқ шунга қарамай, Пол жамоадошларига ҳам вақт ажратади. Златан Ибрагимович ҳамда Ромелу Лукаку «Манчестер Юнайтед»да ўйнаган кезлари Погба улар билан мунтазам равишда стол футболи ва баскетбол ўйнаб турарди.

Бундан ташқари у рақс ва соч турмакларига алоҳида эътибор қаратади. Айнан ушбу икки жиҳат Погбанинг имзоси ҳисобланади.