Xayr, maestro! 2020-yilda butsasini mixga ilgan taniqli futbolchilar haqida

2020-yil ham poyoniga yetib bormoqda. Ushbu yil ko‘p jihatdan qiyin o‘tdi, shu jumladan, futbolda ham bu o‘z aksini topdi. Shuningdek, mazkur yil ko‘plab futbolchilarning butsalarini mixga ilgani bilan ham yodda qoldi. Garchi, bunday futbolchilar soni ko‘p bo‘lsa-da, quyida ularning eng taniqlilariga to‘xtalib o‘tamiz.

David Vilya

Ushbu reytingni Vilyadan boshlash ramziy ahamiyatga ega, chunki u 2020-yilning 1-yanvarida faoliyatini yakunlagandi. O‘sha kuni David Yaponiyaning “Vissel Kobe” klubida so‘nggi o‘yinini o‘tkazgandi. Professional faoliyati davomida 644 ta rasmiy o‘yinda maydonga tushgan Vilya umumiy hisobda 327 ta gol urgan. Sobiq hujumchi “Sporting X”, “Saragosa”, “Valensiya”, “Barselona”, “Atletiko”, “Nyu-York”, “Melburn Siti” va “Vissel Kobe” jamoalarida to‘p surgan. Devid bir futbolchi qo‘lga kiritishi mumkin bo‘lgan barcha yutuqlarga erishdi: La Liga, Qirol Kubogi, Ispaniya Superkubogi, Chempionlar Ligasi, UEFA Superkubogi, Yevropa va Jahon chempionatlari. Ushbu natijalarga faqatgina havas qilish mumkin.

Iker Kasilyas

Iker 2020-yilda nafaqaga chiqqan yana bir ispaniyalik futbolchi. To‘g‘ri, Kasilyas 2019-yilning may oyida deyarli butsalarini mixga ilib bo‘lgandi. O‘shanda Kasilyas yurak xurujini boshidan o‘tkazgan va shundan so‘ng u boshqa maydonga qaytmadi. Ispaniyalik futbolchi 2020-yilning 4-avgustida 39 yoshida faoliyatini yakunlaganini rasman e’lon qildi. Kasilyas “Portu” jamoasi a’zosi sifatida katta futbol bilan xayrlashdi. Ammo sobiq darvozabonning faoliyatidagi asosiy klub, shubhasiz, “Real” bo‘lib qolaveradi. Iker ham Vilya singari barcha sovrinlarni qo‘lga kiritgan. U barcha musobaqalarda 1039 uchrashuv o‘tkazib, 24 ta sovringa ega chiqdi.

Xavyer Maskerano

Argentinalik futbolchi iste’foga chiqqani haqida 16- noyabr sanasida e’lon qildi. Maskerano endilikda maydonga tushish uchun o‘zida ishtiyoq sezmayotganini tan oldi. Qolaversa, karantindan keyin futbolchi jismoniy holatini yaxshilay olmadi. Xavyerning so‘nggi klubi Argentinaning “Estudiantes”i bo‘lib, u 36 yoshida futbol bilan xayrlashdi. Bungacha Maskerano “River Pleyt”, “Korintians”, “Vest Hem”, “Liverpul”, “Barselona” va “Xebey Chayna” jamoalarida o‘ynagandi. Kataloniyaliklar safida Maskerano klub darajasidagi barcha sovrinlarni qo‘lga kiritgan. “Ko‘k-anorranglilar” tarkibidagi 8 yillik faoliyati davomida u butun “Barselona”ga o‘rnak bo‘la olgan. Argentina terma jamoasi bilan Xavyer ikki bor Olimpiadada g‘olib chiqqan, ammo Jahon Chempionati va Amerika Kubogida g‘alaba qozonish unga nasib etmagan.

Mario Gomes

Nemis futbolida o‘z o‘rniga ega bo‘lgan futbolchilardan biri Mario Gomes 2020-yilda katta futbol bilan xayrlashdi. So‘nggi mavsumida Gomes “Shtutgart”ning Bundesligaga qaytishida katta yordam berdi. 2020-yilning 28-iyunida Mario rasman faoliyatini yakunlaganini e’lon qildi. Nemis 34 yoshida katta sportdagi faoliyatiga nuqta qo‘ydi. U “Shtutgart”dan tashqari “Bavariya”, “Fiorentina”, “Beshiktosh” va “Volfsburg” kabi jamoalarda to‘p surdi. Gomesning eng muvaffaqiyatli davri Myunxenda bo‘lganini anglash qiyin emas. “Qizil mashina” safida sobiq futbolchi UEFA Superkubogidan tashqari, barcha sovrinlarni qo‘lga kiritgan. Afsuski, Mario Germaniya termasi safida birorta ham finalda g‘alaba qozona olmagan.

Vensan Kompani

“Anderlext”ning amaldagi murabbiyi 2020-yil 17-avgustida faoliyatini yakunladi va darhol jamoaga bosh murabbiy etib tayinladi. Kompani 34 yoshida faoliyatini yakunlab, o‘z omadini murabbiylikda sinab ko‘rishga qaror qildi. Futbolchilik davrida Vensan “Anderlext”dan ketganidan keyin dastlab, “Hamburg” so‘ngra “Manchester Siti”ga ko‘chib o‘tdi va “shaharliklar” safida 11 mavsum o‘tkazib, ingliz klubi tarixidagi eng yaxshi futbolchilardan biriga aylandi. U “Manchester Siti” bilan birgalikda ichki chempionat bahslarida barcha sovrinlarga ega chiqqan. Ammo Chempionlar Ligasida g‘alaba qozonish nafaqat o‘sha davr, balki shu kungacha ham “shaharliklar” uchun armon bo‘lib qolmoqda. Belgiya terma jamoasida esa sobiq futbolchining yagona yutug‘i 2018-yilgi Jahon Chempionatidagi bronza medali bo‘lgan.

Daniele de Rossi

De Rossi garchi, Franchesko Totti singari jamoaning asosiy yulduzi bo‘lmasa-da, “Roma” va uning muxlislari uchun haqiqiy afsona hisoblanadi. Daniele 17 yil davomida bo‘rilarning asosiy tarkibida o‘ynab keldi. Bu sobiq futbolchining deyarli butun faoliyatiga to‘g‘ri keladi. U 2019-yilning iyul oyida “Boka Xuniors” futbolchisiga aylandi va 2020-yilning 6-yanvar sanasida 36 yoshida nafaqaga chiqdi. “Roma”dagi butun faoliyati davomida sobiq yarim himoyachi atigi ikkita sovrinni qo‘lga kiritgan (Italiya Kubogi va mamlakat Superkubogi). Ammo de Rossi Italiya terma jamoasi safida Jahon chempioni (2006-yili) bo‘lgan. Aynan ushbu sovrin Denielening klub miqyosida yutolmagan barcha sovrinlaridan qadrliroqdir.

Gabi

“Atletiko” afsonasi Gabi bir necha kun oldin katta futbol bilan xayrlashganini e’lon qildi. 37 yoshli ispaniyalikning so‘nggi jamoasi Qatarning “As-Sadd” klubi bo‘ldi. Sobiq futbolchi bundan tashqari, “Xetafe” va “Saragosa”da ham o‘ynagan. Ammo ko‘pchilik uni aynan “Atletiko”dagi o‘yinlari bilan yaxshi eslaydi.

Gabi Madrid klubida shakllanishning barcha bosqichlari – akademiyadan tortib to asosiy tarkibning sardorligigacha bo‘lgan yo‘lni bosib o‘tdi. “Matraschilar” safida u Ispaniyada maqtanishga arziydigan sovrinlarni qo‘lga kiritgan, shuningdek, Gabi jamoaning Yevropa Ligasi (ikki marta) va UEFA Superkubogidagi g‘alabalariga ham o‘zining beqiyos hissasini qo‘shgan.

Shtefan Lixtshtayner

Lixtshtayner professional faoliyati davomida La Ligadan tashqari, barcha top chempionatlarda o‘ynab chiqqan. Shveysariyalik vatanini tark etganidan keyin “Lill”, “Latsio”, “Yuventus”, “Arsenal” va “Augsburg” kabi jamoalarda to‘p tepgan. Shtefanning so‘nggi jamoasi “Augsburg” bo‘ldi. Sobiq futbolchi 36 yoshida 2020-yilning 12-avgustida faoliyatini rasman yakunladi. Uning eng muvaffaqiyatli davri “Yuventus”dagi faoliyatiga to‘g‘ri keladi. “Keksa sinyora” safida esa Lixtshtaynerning Italiyada yutmagan sovrini qolmadi. Biroq unga “Yuventus” safida Chempionlar Ligasi bosh sovrinini boshi uzra baland ko‘tarish nasib etmagan.

Andre Shyurrle

Ro‘yxatni uning eng yosh vakili yopib beradi. Shyurrle atigi 29 yoshida hammasidan voz kechdi. U 17-iyul sanasida butsalarini mixga ildi va motivatsiya topish tobora qiyinlashayotganini, muvaffaqiyatsizliklar esa unga yomon ta’sir qilayotganini tan oldi. Faoliyati davomida sobiq vinger “Mayns”, “Bayer”, “Chelsi”, “Volfsburg”, “Borussiya D”, “Fulhem” va “Spartak Moskva” jamoalarida o‘ynadi. Shyurrle Angliya va Germaniyada bir nechta sovrinlarni ham qo‘lga kiritdi, ammo sobiq futbolchining asosiy yutug‘i, shubhasiz, JCh–2014 dagi g‘alabasi sanaladi. Nemis tez-tez klublarini almashtirar va hech birida o‘z o‘rnini topa olmas edi. Shunga qaramay, uning faoliyatida faxrlanishga arziydigan jihatlarni topish mumkin.

Manba

Boshqa maqolalar: