Хайр, маэстро! 2020 йилда бутсасини михга илган таниқли футболчилар ҳақида

2020 йил ҳам поёнига етиб бормоқда. Ушбу йил кўп жиҳатдан қийин ўтди, шу жумладан, футболда ҳам бу ўз аксини топди. Шунингдек, мазкур йил кўплаб футболчиларнинг бутсаларини михга илгани билан ҳам ёдда қолди. Гарчи, бундай футболчилар сони кўп бўлса-да, қуйида уларнинг энг таниқлиларига тўхталиб ўтамиз.

Давид Вилья

Ушбу рейтингни Вильядан бошлаш рамзий аҳамиятга эга, чунки у 2020 йилнинг 1 январида фаолиятини якунлаганди. Ўша куни Давид Япониянинг «Виссел Кобе» клубида сўнгги ўйинини ўтказганди. Профессионал фаолияти давомида 644 та расмий ўйинда майдонга тушган Вилья умумий ҳисобда 327 та гол урган. Собиқ ҳужумчи «Спортинг Х», «Сарагоса», «Валенсия», «Барселона», «Атлетико», «Нью-Йорк», «Мелбурн Сити» ва «Виссел Кобе» жамоаларида тўп сурган. Дэвид бир футболчи қўлга киритиши мумкин бўлган барча ютуқларга эришди: Ла Лига, Қирол Кубоги, Испания Суперкубоги, Чемпионлар Лигаси, УЕФА Суперкубоги, Европа ва Жаҳон чемпионатлари. Ушбу натижаларга фақатгина ҳавас қилиш мумкин.

Икер Касильяс

Икер 2020 йилда нафақага чиққан яна бир испаниялик футболчи. Тўғри, Касильяс 2019 йилнинг май ойида деярли бутсаларини михга илиб бўлганди. Ўшанда Касильяс юрак хуружини бошидан ўтказган ва шундан сўнг у бошқа майдонга қайтмади. Испаниялик футболчи 2020 йилнинг 4 августида 39 ёшида фаолиятини якунлаганини расман эълон қилди. Касильяс «Порту» жамоаси аъзоси сифатида катта футбол билан хайрлашди. Аммо собиқ дарвозабоннинг фаолиятидаги асосий клуб, шубҳасиз, «Реал» бўлиб қолаверади. Икер ҳам Вилья сингари барча совринларни қўлга киритган. У барча мусобақаларда 1039 учрашув ўтказиб, 24 та совринга эга чиқди.

Хавьер Маскерано

Аргентиналик футболчи истеъфога чиққани ҳақида 16- ноябрь санасида эълон қилди. Маскерано эндиликда майдонга тушиш учун ўзида иштиёқ сезмаётганини тан олди. Қолаверса, карантиндан кейин футболчи жисмоний ҳолатини яхшилай олмади. Хавьернинг сўнгги клуби Аргентинанинг «Эстудиантес»и бўлиб, у 36 ёшида футбол билан хайрлашди. Бунгача Маскерано «Ривер Плейт», «Коринтианс», «Вест Ҳэм», «Ливерпуль», «Барселона» ва «Хебей Чайна» жамоаларида ўйнаганди. Каталонияликлар сафида Маскерано клуб даражасидаги барча совринларни қўлга киритган. «Кўк-анорранглилар» таркибидаги 8 йиллик фаолияти давомида у бутун «Барселона»га ўрнак бўла олган. Аргентина терма жамоаси билан Хавьер икки бор Олимпиадада ғолиб чиққан, аммо Жаҳон Чемпионати ва Америка Кубогида ғалаба қозониш унга насиб этмаган.

Марио Гомес

Немис футболида ўз ўрнига эга бўлган футболчилардан бири Марио Гомес 2020 йилда катта футбол билан хайрлашди. Сўнгги мавсумида Гомес «Штутгарт»нинг Бундеслигага қайтишида катта ёрдам берди. 2020 йилнинг 28 июнида Марио расман фаолиятини якунлаганини эълон қилди. Немис 34 ёшида катта спортдаги фаолиятига нуқта қўйди. У «Штутгарт»дан ташқари «Бавария», «Фиорентина», «Бешиктош» ва «Вольфсбург» каби жамоаларда тўп сурди. Гомеснинг энг муваффақиятли даври Мюнхенда бўлганини англаш қийин эмас. «Қизил машина» сафида собиқ футболчи УЕФА Суперкубогидан ташқари, барча совринларни қўлга киритган. Афсуски, Марио Германия термаси сафида бирорта ҳам финалда ғалаба қозона олмаган.

Венсан Компани

«Андерлехт»нинг амалдаги мураббийи 2020 йил 17 августида фаолиятини якунлади ва дарҳол жамоага бош мураббий этиб тайинлади. Компани 34 ёшида фаолиятини якунлаб, ўз омадини мураббийликда синаб кўришга қарор қилди. Футболчилик даврида Венсан «Андерлехт»дан кетганидан кейин дастлаб, «Ҳамбург» сўнгра «Манчестер Сити»га кўчиб ўтди ва «шаҳарликлар» сафида 11 мавсум ўтказиб, инглиз клуби тарихидаги энг яхши футболчилардан бирига айланди. У «Манчестер Сити» билан биргаликда ички чемпионат баҳсларида барча совринларга эга чиққан. Аммо Чемпионлар Лигасида ғалаба қозониш нафақат ўша давр, балки шу кунгача ҳам «шаҳарликлар» учун армон бўлиб қолмоқда. Бельгия терма жамоасида эса собиқ футболчининг ягона ютуғи 2018 йилги Жаҳон Чемпионатидаги бронза медали бўлган.

Даниэле де Росси

Де Росси гарчи, Франческо Тотти сингари жамоанинг асосий юлдузи бўлмаса-да, «Рома» ва унинг мухлислари учун ҳақиқий афсона ҳисобланади. Даниэле 17 йил давомида бўриларнинг асосий таркибида ўйнаб келди. Бу собиқ футболчининг деярли бутун фаолиятига тўғри келади. У 2019 йилнинг июль ойида «Бока Хуниорс» футболчисига айланди ва 2020 йилнинг 6 январь санасида 36 ёшида нафақага чиқди. «Рома»даги бутун фаолияти давомида собиқ ярим ҳимоячи атиги иккита совринни қўлга киритган (Италия Кубоги ва мамлакат Суперкубоги). Аммо де Росси Италия терма жамоаси сафида Жаҳон чемпиони (2006 йили) бўлган. Айнан ушбу соврин Дэниэлэнинг клуб миқёсида ютолмаган барча совринларидан қадрлироқдир.

Габи

«Атлетико» афсонаси Габи бир неча кун олдин катта футбол билан хайрлашганини эълон қилди. 37 ёшли испанияликнинг сўнгги жамоаси Қатарнинг «Ас-Садд» клуби бўлди. Собиқ футболчи бундан ташқари, «Хетафе» ва «Сарагоса»да ҳам ўйнаган. Аммо кўпчилик уни айнан «Атлетико»даги ўйинлари билан яхши эслайди.

Габи Мадрид клубида шаклланишнинг барча босқичлари – академиядан тортиб то асосий таркибнинг сардорлигигача бўлган йўлни босиб ўтди. «Матрасчилар» сафида у Испанияда мақтанишга арзийдиган совринларни қўлга киритган, шунингдек, Габи жамоанинг Европа Лигаси (икки марта) ва УЕФА Суперкубогидаги ғалабаларига ҳам ўзининг беқиёс ҳиссасини қўшган.

Штефан Лихцҳтайнер

Лихцҳтайнер профессионал фаолияти давомида Ла Лигадан ташқари, барча топ чемпионатларда ўйнаб чиққан. Швейцариялик ватанини тарк этганидан кейин «Лилль», «Лацио», «Ювентус», «Арсенал» ва «Аугсбург» каби жамоаларда тўп тепган. Штефаннинг сўнгги жамоаси «Аугсбург» бўлди. Собиқ футболчи 36 ёшида 2020 йилнинг 12 августида фаолиятини расман якунлади. Унинг энг муваффақиятли даври «Ювентус»даги фаолиятига тўғри келади. «Кекса синьора» сафида эса Лихцҳтайнернинг Италияда ютмаган соврини қолмади. Бироқ унга «Ювентус» сафида Чемпионлар Лигаси бош совринини боши узра баланд кўтариш насиб этмаган.

Андре Шюррле

Рўйхатни унинг энг ёш вакили ёпиб беради. Шюррле атиги 29 ёшида ҳаммасидан воз кечди. У 17 июль санасида бутсаларини михга илди ва мотивация топиш тобора қийинлашаётганини, муваффақиятсизликлар эса унга ёмон таъсир қилаётганини тан олди. Фаолияти давомида собиқ вингер «Майнц», «Байер», «Челси», «Вольфсбург», «Боруссия Д», «Фулҳэм» ва «Спартак Москва» жамоаларида ўйнади. Шюррле Англия ва Германияда бир нечта совринларни ҳам қўлга киритди, аммо собиқ футболчининг асосий ютуғи, шубҳасиз, ЖЧ–2014 даги ғалабаси саналади. Немис тез-тез клубларини алмаштирар ва ҳеч бирида ўз ўрнини топа олмас эди. Шунга қарамай, унинг фаолиятида фахрланишга арзийдиган жиҳатларни топиш мумкин.

Манба

Бошқа мақолалар: