Polshada pandemiya boshidan buyon koronavirusga chalingan fuqarolarning umumiy soni bir million kishidan oshdi. Ayni paytda kasallanganlarning umumiy soni 1 013 747 kishini tashkil qilmoqda. Bu haqda “Korrespondent.net” xabar berdi.
O‘tgan bir sutka ichida mamlakatda COVID-19 bilan kasallanish bo‘yicha 13 855 ta yangi holat qayd etilgan, 609 kishi kasallik oqibatida vafot etgan. Pandemiya boshidan buyon Polshada 18 208 kishi COVID-19 qurboniga aylangan. Shu bilan birga, 620 mingdan ortiq bemor kasallikdan tuzalishga muvaffaq bo‘lgan.
Polsha kasalxonalarida koronavirusga chalingani tasdiqlangan 20 ming kishi davolanmoqda, 2023 nafar bemor sun’iy nafas oldirish apparatiga ulangan.
Polsha Sog‘liqni saqlash vazirligi ma’lumotlariga ko‘ra, so‘nggi kunlarda mamlakatda 42 140 nafar fuqaroda koronavirusni aniqlash bo‘yicha test o‘tkazilgan. Pandemiya boshidan buyon o‘tkazilgan testlar soni 6 317 000 taga yetgan.
Avvalroq Polsha bosh vaziri Matuesh Moravetskiy mamlakat aholisini Rojdestvo bayramini o‘z oilasida faqat yaqin qarindoshlar bilan nishonlashga va sayohat qilmaslikka chaqirgan. Uning qo‘shimcha qilishicha, bayramda harakat cheklanadi, shuningdek, maktab o‘quvchilari Rojdestvogacha masofaviy ta’limga o‘tkazilgan.
Izoh (0)