Qozog‘iston poytaxti Nur-Sultondan Turkistonga ko‘chirilmaydi. Bu haqda mamlakatning birinchi prezidenti Nursulton Nazarboyev “Qozog‘iston” telekanalida Turkiston haqidagi filmda bergan intervyusida ma’lum qildi, deb yozadi “RBK”. “Bunga asos yo‘q. Lekin shuni ta’kidlash kerakki, bu shaharning tarixi juda buyuk”, — dedi u.
Sobiq prezidentning aniqlik kiritishicha, Turkiston musulmonlar va butun turk dunyosi uchun juda ahamiyatli joydir. “Shuning uchun ham, ehtimol, poytaxtning ko‘chirilishi haqida fikrlar paydo bo‘lar”, — deya qo‘shib qo‘ydi Nazarboyev.
Avvalroq poytaxtning Nur-Sultondan ko‘chirilishi ehtimoli haqida “Platon.Asia” portali xabar bergan edi. Maqola mualliflari ma’lum qilishicha, Nazarboyev ilgari ma’muriy markazni Turkistonga ko‘chirish haqida o‘ylaganini tan olgan, ammo o‘shanda unga sharoit to‘sqinlik qilgan. Shuningdek, mualliflar ushbu shahardagi faol qurilishlar va me’moriy yodgorliklarning qayta tiklanishi aynan shu bilan bog‘liq deb taxmin qilgan.
Nazarboyev Qozog‘istonni prezident sifatida qariyb 30 yil boshqardi va davlat rahbari sifatidagi vakolatlarini 2019-yilning 20-martida topshirdi. Ushbu voqeadan keyin senat spikeri bo‘lgan Qosim-Jo‘mart To‘qayev prezident vakolatlarini qabul qildi.
Nazarboyev Xavfsizlik kengashi rahbari va Nur otan partiyasi yetakchiligini o‘zida saqlab qoldi. Oktabrda To‘qayev Nazarboyevning kadrlar siyosati bo‘yicha vakolatlarini yanada kengaytirdi va mamlakatda vazirlarni lavozimga tayinlash Xavfsizlik kengashi bilan kelishgan holda amalga oshirilishi haqida yangi farmon chiqardi. TIV, IIV va Mudofaa vazirligi rahbarlari bundan mustasno.
2015-yil 26-apreldagi prezidentlik saylovlarida Nazarboyev beshinchi bor g‘alaba qozongan va 98 foiz ovoz olgan. Uning prezidentlik muddati 2020-yilda poyoniga yetishi lozim edi. Qozog‘iston konstitutsiyasiga ko‘ra Nazarboyev Qozog‘istonning birinchi prezidenti sifatida prezidentlikka cheklanmagan miqdorda o‘z nomzodini qo‘yish huquqiga ega.
Qozog‘istonning birinchi prezidenti Nursulton Nazarboyev iste’foga chiqqanini e’lon qilganidan keyin poytaxt Ostona shahri nomi Nur-Sultonga o‘zgartirilgan, Qarag‘anda, Chimkent, Pavlodar, Ust-Kamnegorsk va Petropavlovskda Nazarboyev nomi bilan atalgan ko‘chalar paydo bo‘lgandi. Keyinchalik mamlakatning barcha viloyatlarida bittadan ko‘chaga birinchi prezident nomini berish taklif qilingan.
Iste’fodan keyin Nazarboyev rassomlik faoliyati bilan shug‘ullanayotgani, vaqtini oilasi va nevaralari bilan o‘tkazayotganligini bildirgan. U moybo‘yoqda tabiat manzaralarini tasvirlamoqda va uning ijod namunalari keyinchalik Qozog‘istondagi muzeylarga joylashtirilishi mumkin. Sobiq prezident do‘stlari va tanishlari tavsiyasiga ko‘ra, 30 ga yaqin ishlarni chizib tugatganligini bildirgan.
Izoh (0)