Польшада пандемия бошидан буён коронавирусга чалинган фуқароларнинг умумий сони бир миллион кишидан ошди. Айни пайтда касалланганларнинг умумий сони 1 013 747 кишини ташкил қилмоқда. Бу ҳақда «Korrespondent.net» хабар берди.
Ўтган бир сутка ичида мамлакатда COVID-19 билан касалланиш бўйича 13 855 та янги ҳолат қайд этилган, 609 киши касаллик оқибатида вафот этган. Пандемия бошидан буён Польшада 18 208 киши COVID-19 қурбонига айланган. Шу билан бирга, 620 мингдан ортиқ бемор касалликдан тузалишга муваффақ бўлган.
Польша касалхоналарида коронавирусга чалингани тасдиқланган 20 минг киши даволанмоқда, 2023 нафар бемор сунъий нафас олдириш аппаратига уланган.
Польша Соғлиқни сақлаш вазирлиги маълумотларига кўра, сўнгги кунларда мамлакатда 42 140 нафар фуқарода коронавирусни аниқлаш бўйича тест ўтказилган. Пандемия бошидан буён ўтказилган тестлар сони 6 317 000 тага етган.
Аввалроқ Польша бош вазири Матуэш Моравецкий мамлакат аҳолисини Рождество байрамини ўз оиласида фақат яқин қариндошлар билан нишонлашга ва саёҳат қилмасликка чақирган. Унинг қўшимча қилишича, байрамда ҳаракат чекланади, шунингдек, мактаб ўқувчилари Рождествогача масофавий таълимга ўтказилган.
Изоҳ (0)