Ozarbayjonda Tog‘li Qorabog‘dagi urushni to‘xtatish bo‘yicha kelishuvlar boshlangan kun — G‘alaba kuni etib belgilandi

Ozarbayjonda yangi bayram — G‘alaba kuni joriy etildi, u har yili 10-noyabrda nishonlanadi. Bu haqda mamlakat prezidenti Ilhom Aliyevning tegishli farmoniga tayanib, “RBK” xabar berdi. Ushbu kunda Ozarbayjon, Armaniston va Rossiya Tog‘li Qorabog‘dagi jangovar harakatlarni to‘xtatish bo‘yicha kelishuvlarni boshlagan.

Prezident Aliyev o‘z farmonida Bokuning mazkur mojaroga nisbatan nuqtayi nazarini ifoda etgan bo‘lib, unga ko‘ra Armaniston avval boshidan Ozarbayjonga tegishli bo‘lgan hududlarning bir qismini egallab olgan. Aliyev Ozarbayjon armiyasining g‘olibona harakatlarini ta’kidlab o‘tgan; shuningdek, bir nechta shaharlar qo‘lga kiritilgan, jumladan, tarixiy ahamiyatga ega Shusha shahri ham.

Mamlakat rahbarining ma’lum qilishicha, G‘alaba kuni “xalqning qudrati va milliy g‘urur tantanasiga aylangan hamda davlatning obro‘si va kelajak taraqqiyoti uchun alohida ahamiyatga ega bo‘lgan mislsiz g‘alabani abadiylashtiradi”.

Armaniston esa Ozarbayjonning Tog‘li Qorabog‘ hududiga egalik huquqini rad etib, Bokuning ushbu mojarodan maqsadi arman xalqini yakson etish bo‘lganini ta’kidlamoqda.

Aliyevning yana bir farmoni bilan Xotira kuni ham tashkil etilgan bo‘lib, u 27-sentabr kuni nishonlanadi. Ushbu kunda Armaniston va Ozarbayjon o‘rtasidagi harbiy mojaro keskinlashgan.

Eslatib o‘tamiz, Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Shundan so‘ng Armanistonda ushbu bitim sabab norozilik namoyishlari boshlandi va u ikki haftadan buyon davom etmoqda. Bitimga ko‘ra, Ozarbayjon mintaqa hududining katta qismini olgan. Muxolifat Pashinyan “xoinlik” shartnoma imzolangani sababli iste’foga chiqishini talab qilmoqda.