Kishinyovdan o‘zini o‘zi respublika deb e’lon qilgan Pridnestrovye Moldova Respublikasi (PMR) joylashgan va uning nazorati ostida bo‘lmagan Dnestr chap qirg‘og‘i iste’molchilari tomonidan foydalanilgan gaz uchun qarzni to‘lab qo‘yishni talab qilish adolatsizlik va noinsoflikdir. Bu haqda Moldovaning saylangan prezidenti Mayya Sandu “RBK” telekanaliga bergan intervyusida aytib o‘tdi.
“O‘ng qirg‘oqda bizning ‘Gazprom’dan qarzimiz deyarli yo‘q, chunki biz to‘layapmiz va barcha yillar davomida to‘lab kelganmiz. Chap qirg‘oqda esa gaz uchun pul to‘lanmagan va u yerdagi qarz juda katta. Va albatta, biz, o‘ng qirg‘oqdagilardan to‘lashimizni kutish kerak emas. Bu insofdan emas, adolatdan emas”, — dedi u.
Sanduning so‘zlariga ko‘ra, umumiy qarz miqdori hozir qariyb 7,5 milliard dollarga teng va Dnestrning o‘ng qirg‘og‘idagi odamlar chap qirg‘oqdagilar gazga pul to‘lamayotganidan boshqa narsa haqida gapirmaydi.
“Keyin esa ‘Pridnestrovyening gaz uchun ulkan qarzini kim to‘laydi?’ degan gaplar boshlanadi… Bu katta muammo, lekin uni hal qilish kerak”, — deya ta’kidladi Sandu.
Moldova prezidenti saylovining ikkinchi bosqichida g‘alaba qozonganidan keyin ko‘p o‘tmay, Sandu PMRda gaz uchun to‘planib qolgan qarzlarni tan olmasligini aytgan edi.
“O‘ng qirg‘oqdagi Moldova gaz uchun, shu jumladan, Rossiya gazi uchun pul to‘laydi. Shuning uchun hatto Pridnestrovye gazni bepul ishlatib, qarz Moldovaning bo‘ynida, deyayotgan bo‘lsa ham, bu unday emas. Biz hech qachon bu qarzni tan olmaymiz. Bu Pridnestrovye “hukumati”ning qarzi, bizdan hech kim bu gazni olish-olmasligimiz haqida so‘ragan emas”, — degan edi Sandu “Yevropeyskaya Pravda” nashriga bergan intervyusida.
2020-yilning uchinchi choragi uchun hisobotda “Gazprom” Rossiya Savdo-sanoat palatasi huzuridagi Xalqaro tijorat arbitraj sudi uning “Moldovagaz” (kompaniya aksiyalarining 50 foizi “Gazprom”ga tegishli)dan 2017-yilda yetkazilgan gaz uchun qarzdorlikni so‘ndirish uchun 246 million dollardan ziyod summani undirib olish haqidagi da’vosini qondirganini ma’lum qildi. O‘sha hujjatning o‘zida aytilishicha, 2011—2019-yillarda Moldovaning qarzdorligi Pridnestrovye iste’molchilarining to‘lamay yurishlari tufayli o‘sgan.
“Moldovagaz” saytidagi hisobotga ko‘ra, 2019-yil 31-dekabr holatiga ko‘ra, kompaniyaning “Gazprom”dan 6,3 milliard dollardan ziyod, “Gazprom”ga bog‘liq “Faktoring Finans” kompaniyasidan esa yana 1,1 milliard dollardan ortiq qarzi bo‘lgan.
Avvalroq Mayya Sandu Moldovadagi Rossiya tinchlikparvarlarini YeXHTning noharbiy missiyasiga almashtirishni taklif qilgan edi.
Mayya Sandu 15-noyabrda prezidentlik saylovlarining ikkinchi turida 57,72 foiz ovoz olgan, amaldagi prezident Igor Dodon esa 42,28 foiz ovoz to‘plagan. Saylovoldi kampaniya vaqtida Sandu Yevropa Ittifoqi siyosatini joriy etishni taklif qilgandi.
Moldovada prezidentlik saylovlarining birinchi turi 2020-yil 1-noyabr kuni bo‘lib o‘tgan. Unda Dodon 32,74 foiz natija bilan Sandudan ortda qolgan edi (unda 35,96 foiz ovoz).
Moldovada prezidentlik saylovlarini o‘tkazish 2019-yilning iyunida respublikaning Konstitutsiyaviy sudi Dodonni deputatlar so‘rovi bo‘yicha lavozimidan chetlashtirgach belgilangan edi. Bu 2016-yili Dodon prezident etib saylanganidan buyon oltinchi marotaba chetlashtirish hisoblanadi. Rossiya prezidenti Vladimir Putin 16-noyabrda Mayya Sanduni Moldova prezidenti saylovlaridagi g‘alabasi bilan tabriklagan.
Izoh (0)