Moldaviyadagi prezident saylovining 2-bosqichi belgilandi. 1-bosqichda Igor Dodon Mayya Sandudan ortda qoldi

Moldaviya sobiq bosh vaziri hamda yevropaparast Harakat va birdamlik muxolifat partiyasi yetakchisi Mayya Sandu 1-noyabr kuni bo‘lib o‘tgan mamlakat prezidenti saylovida ovozlarning 35,96 foizini to‘pladi. Bu haqda Moldaviya Markaziy saylov komissiyasi saylovchilarning 99,67 foiz byulletenlarini hisoblab chiqib ma’lum qildi, deb yozadi Meduza.

Amaldagi Igor Dodon ovozlarning 32,74 foizini to‘pladi. “Bizning partiya” yetakchisi va Belsi shahri meri Renato Usatiy — uchinchi o‘rinda (16,94%).

Shu tariqa, Sandu va Dodon saylovning 15-noyabrga belgilangan ikkinchi bosqichiga o‘tadi. Birinchi bosqichda g‘alaba qozonish uchun nomzodlar saylovchilarning 50 foizdan ortiq ovozlarini to‘plashi kerak edi.

1-noyabr kungi saylovlarda saylovchilarning 42,76 foizi qatnashgan. Sanduning saylov shtabi ovoz berish chog‘ida 300 dan ortiq qoidabuzarliklarni qayd etgan.

Eslatib o‘tamiz, AQShda prezident saylovlari 3-noyabr kuni bo‘lib o‘tadi. Unda amaldagi prezident Donald Tramp va demokratlardan nomzod, AQSh sobiq vitse-prezidenti Jo Bayden qatnashadi.