Amerikaning Moderna farmatsevtik kompaniyasi AQSh oziq-ovqatlar va dorilar sifati ustidan sanitar nazorat boshqarmasi (FDA)ga o‘z vaksinasini koronavirus infeksiyasiga qarshi qo‘llashni ma’qullash uchun ariza berdi. Bu haqda “RBK” kompaniya Twitter’iga tayanib xabar bermoqda.
“Moderna ma’lumotlari mRNA-1273 vaksinasidan foydalanishni shoshilinch avtorizatsiya qilish so‘rovi uchun FDA’ga yo‘naltirildi”, — deyiladi bayonotda.
Avvalroq FDA Moderna’ning arizasi 17-dekabr, boshqarmaning vaksinalar va ular bilan bog‘liq biologik mahsulotlar bo‘yicha mahsulot qo‘mitasining majlisi kuni ko‘rib chiqilishini ma’lum qilgan edi. Ammo tibbiy regulyator vaksina qanday muddatda ma’qullanishi haqida aytmagan edi.
Kompaniya rahbari Stefan Bansel koronavirus infeksiyasiga qarshi vaksinaning har bitta dozasi 25 dollardan 37 dollargacha bo‘lishini ma’lum qildi. Uning so‘zlariga ko‘ra, yakuniy narx buyurtmachiga zarur bo‘lgan partiya hajmiga bog‘liq bo‘ladi. “COVID-19’ga chalingan og‘ir bemorlarni davolash sog‘liqni saqlash tizimiga qanchaga tushayotganini hisobga olganda, bu adolatli narx. Biz maksimal daromad olishga qiziqqanimiz yo‘q”, — deya aniqlik kiritdi Bansel.
Kompaniya vaksina samaradorligini dastlabki tahlilda 94,1 foiz, kasallikning og‘ir holatlarida esa 100 foiz deb baholadi.
21-noyabr kuni AQShda Pfizer farmatsevtika kompaniyasi ham 94 foiz samaradorlikka ega vaksinasini ro‘yxatdan o‘tkazish uchun ariza bergandi.
Izoh (0)